¿Cómo nun se mos ocurriera enantes? La solución nun yera contratar mélicos pa cubrir les baxes, xestionar de manera afayaiza los recursos de la Sanidá Pública o desixir más fondos si son precisos. La solución ye pidir a los enfermos que seyan breves, o ya puestos, que queden en casa a morrer tranquilamente

Les llumbreres que dieron cola solución d’echar la culpa a los pacientes trabayen nel cientru salú La Madalena, n’Avilés, ún de los munchos a los que los retayos en sanidá lleva a carecer una severa falta de mélicos. En concreto, de los 11 facultativos, falten dos por baxa, que nun ta siendo cubierta por otros mélicos. Nun son los únicos de la comarca, va unos díes los vecinos de Les Vegues denunciaben demores de dellos díes nes cites col mélicu de cabecera y retrasos mayores en pediatría.

La Conseyería de Sanidá llávase les manes: nun hai mélicos nel país. Albidro que nun cuenten los que tan en paru, los que tuvieron qu’emigrar pa trabayar, los que nun pasaron la peñera de les escasísimes places del MIR nin les centenes de mélicos potenciales que queden a la puerte la Universidá d’Uviéu ca añu por mor d’unos númberos clausus surrealistes.

Asina que n’Avilés decidieron adautase a los tiempos y aplicar l’estilu fast food a la melecina “Dolor de tiesta con mareos y revoltura” “marchando una d’ibuprofenos con salsa d’omeprazol”, “Cansanciu xeneralizáu con dolor muscular y problemes p’alendar” “Endelgace”; ¿pa qu’echar más tiempu? La concisión y la rapidez ye mui valoratible güei díe y val de práutica pa cuando istalen los ordenaores mélicos que solucionarán el problema pa siempres. “Calque nos síntomes que-y correspuendan… Siéntolo, ta vusté muertu. Calque enter.”

Llucía F.Marqués

This work is licensed under a Creative Commons Attribution 4.0 International License.