La ochava edición del alcuentru cultural va allugase del 17 al 19 d’abril en dellos recintos de Xixón y ya tien confirmaos dellos artistes comu James Rhodes, Redd Kross, Erlend Øye & La Comitiva, Alain Johannes, Bobkat’65, Lorena Álvarez, Los Saxos del Averno, Tito Ramírez, Diego Vasallo, Primas Hermanas y Festinfante presenta Queenmanía
- Yá tán a la venta los bonos (40 €) y les entraes simples pa los conciertos en www.gijonsoundfestival.com.
La edición nueva del Xixón Sound Festival yá tien fecha de celebración. El festival xixonés va ser los díes 17, 18 y 19 d’abril. Esti alcuentru cultural, entamáu por Divertia Xixón y producíu por Mestizo Producciones, cumple asina la so edición ochava y caltién el so xeitu de faer ciudá y de promocionar Xixón acullá les nueses llendes. Cuenta col padrociniu de Vibra Mahou, que sofita a artistes de corrientes musicales estremaes, xenerando asina esperiencies inolvidables al averalos al públicu con momentos de conesión únicos.
Un curiáu y escoyíu apueste musical llocal, nacional ya internacional sedrá’l puntu de xunión d’esti alcuentru. A falta de más artistes por confirmar, destaca’l regresu de James Rhodes. La so primer actuación n’España foi precisamente nel Xixón Sound Festival en 2016. Nesta ocasión, el músicu británicu llegará pa celebrar el 250 aniversariu de la ñacencia de Beethoven.
Redd Kross, Diego Vasallo o Lorena Álvarez pisarán los escenarios del Xixón Sound Festival 2020 pa presentar oficialmente los sos trabayos nuevos. Xúnense Alain Johannes, Bobkat’65, Los Saxos del Averno, Tito Ramírez, Primas Hermanas y Erlend Øye & La Comitiva, grupu fundáu pol alma mater de Kings of Convenience.
D’otramiente, esti festival sigue apostando por averar la música en direuto a la reciella, cola actuación de Festinfante, que, n’esta ocasión, presenten el show Queenmanía.
Amás, Xixón Sound Festival 2020 anueva les sos actividaes complementaries alternatives, cola mira d’ufrir a la ciudadanía y visitantes una esperiencia global que vivir en Xixón. El surf va tener una presencia destacada nel festival al traviés de charres temátiques, cursos y bautismos empobinaos a toles persones que quieran averase a esti deporte tan enraigonáu nel conceyu.
La edición d’anguaño tamién apostará pola sostenibilidá, un retu al que la mayoría de los eventos culturales s’enfrenten y una seña de identidá que siempres carauterizó al X.S. Festival. Habrá delles colaboraciones con decenes d’entidaes, como otros festivales, asociaciones, escueles, hoteles, restoranes y organizaciones non gubernamentales, qu’añaden conteníu y ufierta a la esperiencia.
Redaición InfoAsturies
This work is licensed under a Creative Commons Attribution 4.0 International License.
