De los 602 millones previstos pa meyores nos trenes asturianos pente los años 2017 y 2025 namás van utilizándose 23’5
El Plan de Cercanies aportó a finales del 2017 comu rempuesta a la presión social que desixía meyores nel ferrocarril asturianu que torgaren el so desaniciu. L’entós Ministru de Fomento, Iñigo de la Serna (PP) ya’l Conseyeru d’Infracadarmes (agora senaor pol PSOE) Fernando Lastra, anunciaron un ambiciosu programa de meyores con una inversión total de 602 millones d’euros a invertir nos vinientes ocho años, de los que 338,8 destinaríense a la rede d’anchu ibéricu y los 178,6 restantes a la d’anchu métricu (antigua Feve). D’ente les obres programaes, 51 intervenciones foron destacaes comu “d’alta prioridá”, destinándose a elles 192 millones d’euros y un plazu de dos años.
Naquel intre Lastra vaticinó que, de nun cumplise’l programa, “les cercanies asturianes taríen en situación de quiebra téunica”. El programa nun se ta cumpliendo.
De magar el 2017 van faciéndose meyores por valor de 23’5 millones d’euros, menos de la cuarta parte de lo presupuestao pa esti tiempu. El proyeutu incluyía una renovación dafechu del trazáu y maquinaria, por valor d’88 millones, de los que se van utilizando 220.000 euros, y abondes obres puntuales comu les del tramu L.lena-Xixón, que cuntaba con un presupuestu de 296 millones colos que s’adautaría al anchu internacional y s’aforraríen más de 10 menutos por trayeutu, pero na que se van invirtiendo de fechu unos escasos 300.000 euros, el 0’1%.
Entantu la situación del ferrocarril asturianu sigui a pior, mui especialmente no que cinca a tresporte de viaxeros en cercanies, averándose a la quiebra téunica anunciá por Lastra y agravando los serios problemes de comunicación interna ya esterna que llastren Asturies.
Llucía F. Marqués
This work is licensed under a Creative Commons Attribution 4.0 International License.
