Depués d’un branu nel que la masificación turística xeneró problemes nos puntos más emblemáticos del país, ensin malpenes vuelos nin comunicaciones col esterior, con unos niveles de contaminación que convierten l’aire asturianu nun de los más dañibles d’Europa y con un esmolecedor grau de precarización llaboral nel seutor, el gobiernu d’Adrián Barbón vien d’anunciar la repetición de la fórmula que prioriza el turismu comu seutor de futuru n’Asturies

Cuasi 40 años depués del llanzamientu de la mítica campaña “Asturias, Paraiso Natural” la viceconseyera de Turismu, Graciela Blanco, vien d’anunciar que’l “Principado invertirá 6,8 millones de euros “pa reforciar Asturies como destín turísticu”. La fórmula, repitía fasta la saciedá nes caberes décades, básase en 3’4 millones d’euros en campañes de publicidá (un 76% más que l’añu anterior) y la participación nos principales salones temáticos de turismu.

Cuntando con una población que destaca pola so preparación universitaria en tolos ámbetos y una tradición agrícola y ganadera de sieglos, el “Principado” sigue viendo’l turismu rural como única opción y sector fundamental para’l desendolque económicu. Les opciones llaborales qu’ufre esti seutor son ensin dubia abondoses, seique pocu petecibles: la hostelería ye’l seutor que xenera trabayos de pior calidá y mayor rotación; tamién ye’l más sensible a les variaciones económiques ya’l primeru en cayer en casu de crisis.

Na so intervención quedó ensin resolver qu’estratexia cuenten siguir pa qu’esos turistes aporten a Asturies, nin comu se van mover pel país, considerando los problemes de comunicación internos ya esternos que se carecen. Tampocu se faló de la dificultá de siguir plantegando un “destín de naturaleza”  al tiempu que se desprotexen los espacios naturales y se consiente les continues emisiones contaminantes que tornen l’aire asturiano n’un de los más peligrosos d’alendar d’Europa.

This work is licensed under a Creative Commons Attribution 4.0 International License.