La sentencia que daba la razón al sindicatu yá ye firme, al dar como nun presentáu’l recursu de suplicación la parte contraria

A entamos d’Avientu pasáu, el xulgáu de lo social nº3 de Xixón anulaba les elecciones sindicales de Vauste (antigua Tenneco) por escluyir illegalmente a la llista de la CSI, encabezada pol secretariu xeneral de sindicatu Nachu Fuster. La sentencia yera por definición irrecurrible, pero dende CCOO y UXT decidieron igualmente presentar un recursu contra ella, cola intención, según representantes de la CSI, de retrasar el cumplimientu de la mesma, daqué que consiguieron mientres dos meses.

Finalmente, dende la selmana pasada, la sentencia ye firme, lo qu’obligó a la empresa a restituyir nel comité, volviendo a la situación esistente previa a la celebración d’elecciones el pasáu mes d’ochobre de 2019.
La CSI fuera’l sindicatu más votáu nel anterior comité d’empresa, siendo los únicos que lleven denunciando dende un principiu la falta de carga de trabayu qu’asegure un futuru a la empresa y a los sos trabayadores. Nun intentu d’estremalos del so llabor, el secretariu xeneral de CSI Vauste, Nachu Fuster, foi sancionáu con suspensión d’empléu y sueldu, sanción que foi anulada pol xulgáu, lo mesmo que’l despidu disciplinariu a otru emplegáu, militante del mesmu sindicatu. Asina que con esta son trés les sentencies que respuenden por lo que dende CSI lleven denunciando va tiempu: la esistencia d’un boicó contra la so organización dientro de la empresa nel que participen viviegamente los otros sindicatos.