El Grupu d’Inmatriculaciones Asturies denuncia que Foncalada ye lo único del Prerrománicu que mos queda a los asturianos en propiedá, el resto ta en manes de la Ilesia Católica
Dende 1946 y fasta va cincu años la ilesia católica tuvo la prerrogativaha d’inscribir nel Rexistru la Propiedá bienes inmuebles apurriendo namás una autocertificación eclesiástica ya ensin dalu entítulu de propiedá. Ensin publicidá, ensin abrir un espediente de dominiu, ensin dalu procedimientu que garantice el so drechu. Nel 1998 el gobiernu d’Aznar ampliaba esti beneficiu, permitiendo inmatricular tamién llugares de cultu.
Gracies a esta permisividá llegal la ilesia, nun espoliu ensin precedentes, punxo al so nome bienes pertenecientes al pueblu por valor de munchos millones: llocales, finques, viviendes, cimenterios, ilesies, places catedrales…más de 100.000 propiedaes en tol estáu.
N’Asturies, comu indica’l Llibru Blancu del Prerrománicu Asturianu y comu reconoció nes sos declaraciones l’arzobispu Jesús Sanz Montes, tol Prerrománicu ta a nome de la ilesia, escluyendo Foncalada, n’Uviéu. Col robu del Prerrománicu la ilesia non solo se fae con bienes de descomanáu valir económicu ya singularidá arquiteutónica, sinón que remanen pa si pieces perimportantes de la cultura asturiana, imprescindibles pal conocimientu la nuesa hestoria.
Desconozse entá l’algame total de les inmatriculaciones n’Asturies, ya que la rempuesta apurría al Grupu Inmatriculaciones Asturies nun da los datos solicitaos y, sigún el mesmu Grupu “ye una burlla”, entanto que la pidición fecha a la Xunta Xeneral nun recibió rempuesta.
Llucía F. Marqués
This work is licensed under a Creative Commons Attribution 4.0 International License.
