Anque ameyora los aspeutos más dañibles de la LOMCE (segregación de los escolinos, eliminación de competencies a claustros y conseyos escolares, calificación de la materia de Relixón, reválides, etc.), a la nuea reforma educativa falta-y enforma pa ser un apueste valiente pol tresformamientu fondu que’l sistema educativu precisa

Cola so aprobación per parte’l Conseyu Ministros, la nuea Llei educativa atópase’n fas de tramitación parllamentaria. Magar reconocen que ye positiva en dellos aspeutos, el sindicatu d’ensiñantes asturianu, SUATEA, echa en falta munches midíes que permitiríen avanzar a la escuela pública y que nun se recoyeron nesta llei.
Dalgunes d’elles son hestóriques: la salida de la relixón del currículu educativu, la reversión efeutiva de los retayos aplicaos a la educación de magar 2012 o la eliminación de los conciertos educativos con colexos privaos y la derivación d’esos presupuestos a centros públicos; la doble rede pública/rede alcordada del sistema educativu español representa una anomalía dientro de la Unión Europea, suponiendo una evidente segregación y desigualdá del alumnáu.
Precisamente, los aspeutos rellacionaos cola inclusión y la equidad son una prioridá pa esti sindicatu, que considera que “tienen de ser una prioridá p’ameyorar el sistema educativu con perspeutiva social y non mercantilista”. La discriminación educativa por motivos socioeconómicos tien como consecuencies altes tases d’abandonu escolar y la perpetuación de situaciones de probitú y esclusión social.
L’atención a la diversidá tampoco atopa sofitu na nuea llei, al caltenese los retayos de los últimos años y nun contemplase l’amenorgamientu de los ratios, nin la mayor dotación presupuestaria, necesaria pa reforzar los equipos d’orientación y ameyorar les condiciones llaborales d’unos docentes sobrecargados y en situación precaria.

Finalmente, el sindicatu incide na necesidá d’una xestión más democrática de los centros, la elleición de les direciones sigui dependiendo en gran midía de l’Alministración.
Los sindicatos d’enseñanza consideren sintomáticu que’l Ministeriu d’Educación nun convocara nenguna mesa de negociación cola comunidá educativa pa consensuar esta nuea Llei, que ye una reforma de la LOMCE y un torna a la LOE, que nel so momentu SUATEA y los STES-i yá calificaron d’insuficiente. “Perdióse una oportunidá pa que’l profesoráu y la comunidá educativa, que son quien finalmente apliquen la llei, puedan opinar y aldericala en fondura”.

Comu yera d’albidrar, la LOMLOE nun recueye nin una pallabra sobro la escolarización del asturianu y la so utilización comu llingua vehicular.

Redaición InfoAsturies

This work is licensed under a Creative Commons Attribution 4.0 International License.