La Fiscalía Superior del “Principado” investigará los fechos recoyíos nel informe de la Sindicatura Cuentes, que podríen ser costitutivos de delitu

Nel informe de la Sindicatura Cuentes 2019 recuéyense esplícitamente una llarga riestra d’irregularidaes, incumplimientos llegales y falta d’información qu’afeuten, pente otros, a concesión de sovenciones -munches d’elles nominales-, contrataciones, desendolcu d’obres, usu de los fondos, contabilidá, cumplimientu d’oxetivos, procedimientos, etc…, implicando importantes sumes económiques. Sicasí, dengún organismu entamó dala aición llegal pa depurar responsabilidaes, polo que dende’l partíu nacionaliegu consideraron necesario facer un llamáu direutu a la Fiscalía solicitando la so intervención.

La solicitú d’apertura de dilixencies fore presentada por Andecha Astur el pasáu mes de Febreru, por mor de los posibles delitos recoyios nel informe de la Sindicatura Cuentes, órganu oficial dependiente de la Xunta Xeneral de Asturies al que correspuende’l control esternu de l’actividá económico-financiero del seutor públicu asturianu.

Na rempuesta de la Fiscalía Xeneral infórmase de l’aceutación de la solicitú d’Andecha y l’aniciu de les dilixencies oportunes pa que s’esclarien los fechos denunciaos, entamándose la oportuna investigación de los posibles delitos, y que nel so casu, se pongan en marcha les aiciones oportunes contra toes aquelles autoridaes que pudieren ser responsables, por aición o omisión, de fechos con consecuencies en materia de responsabilidá civil o penal nel ámbetu de l’Alministración Pública Asturiana”.