Los campesinos faen una dura crítica al gobiernu d’Adrián Barbón, al qu’acusen de crear órganos meramente consultivos “pa recordanos que la cosa ta “jodida”” al tiempu que toma medíes “parche”, abocaes al fracasu dende l’entamu pol mesmu sistema de llibre mercáu inxustu qu’ellos mesmos apuntalen; ” la “xente’l pueblu” no necesitamos semeyes de políticos, necesitamos políticos veraces y comprometidos” afiten

Recién dió a conocese la creación d’un Movimientu Asturianu de Resistencia Rural, una organización entamada por xente del campu que quieren lluchar pol so mediu de vida y que recueyen los sos esmolecimientos nun  completu Manifiestu nel que repasen la realidá y les necesidaes de l’Asturies rural.

El Manifiestu entama col reconocimientu de la situación actual, la más qu’evidente fonda crisis del universu rural asturianu qu’abulta lleválu camín del desaniciu, xunida -o frutu de- a la inesistencia de polítiques eficaces que frenen la despoblación, recuperen la rentabilidá de les esplotaciones agraries y dignifiquen la vida rural.

Sigui faciendo una apreciación perimportante:ser rural ye daqué más que vivir en pueblu, ye participar d’una cultura “tien de recuperase y ponese’n valor la identidá campesina asturiana”.

Destaquen la destrución de les posibilidaes de supervivencia de les caseries qu’implica l’actual sistema socieconómicu imperante “basáu na competitividá y les produciones en gran escala” y la necesidá de recuperar el drechu a la xestión del territoriu y la soberanía alimentaria. Pa ello revindiquen la recuperación de l’agricultura propio y les caseríes tradicionales frente a les multinacionales alimentaries y la puesta en valor de sistemes de ganadería y agricultura respetuoses pa col mediu ambiente y los animales, aunque eso implique unos precios más altos, imprescindibles per otru llau pa caltener la economía rural.Otru de los problemes que planteguen ye la perda de representación política de los moraores, el puxu del “Aria cientral”, que lleva les inversiones pol so pesu en voto. Esto traduzse’n desaniciu de los servicios públicos nes fasteres rurales: sanidá, educación, cultura, lo que continúa’l círculu viciosu del abandonu, la despoblación y la perda d’inversiones.

Nun escaecen les sos otres fontes d’ingresu: hostelería, artesanía, turismu…  pegoyos, en menor midía, d’esta economía, pero reclamando tamién ” un exerciciu de reflexon por parte de tola sociedá”. Los incidentes de los últimos años con turistes y visitantes -invasión de cultivos, escolfore del ganao, secuestru de perros y otros animales supuestamente “abandonaos”, usu d’espacios y vies necesarios pal desendolcu de llabores, etc…- faen preciso puntualizar el pelligru de querer “urbanizar” el monte o de tornalu nuna triba de parque temáticu de si mesmu.

Especial interés tien el puntu 8, sobro ecoloxía y agroganadería, nel que ponen enfotu nel necesariu averamientu pente los dos seutores más implicaos na conservación del mediu natural, que al tiempu son dos seutores frontalmente enfrentaos. Piden un alderique qu’aide a alcontrar términos medios nos que se controlen tanto les agresiones al mediu ambiente que pueden implicar dalgunes práutiques agraries comu los daños que les especies invasores, les plagues y la fauna selvaxe xeneren nos ganaos y cultivos, buscando soluciones que permitan xunir caltenibilidá ecolóxica, respetu al ecosistema y proteición de les esplotaciones agroganaderes.

Finalmente, reclamen proteición contra la especulación nel mediu rural, el turismu masivu y l’acesu a la tierra, qu’encarez los alquileres y los precios de compra, condergando a pueblos enteros a convertise n’urbanizaciones pa turistes y fines de selmana, al tiempu que torga la incorporación  de mocedá a la vida rural colos sos precios abusivos y cola urbanización de les tierres.

En resume, llamen a la llucha y a la xunidá d’aición pa recuperar una cultura, un sistema económicu y un mou de vida milenarios, que foron el nuesu pasáu y, si siguen alantre na so brenga, pueden ser el nuesu futuru.

“Si la Asturies rural despierta y se llevanta d’esti mal suañu, toa Asturies volverá a ser la lluz qu’allume’l nuesu pueblu y la nuesa clase social”.

Llucía F. Marqués