Les caberes noticies que topé falen de 107 contaxos n’Asturies. Nun ye fácil d’atopar porque la prensa asturiana recueye les cifres d’España en titular y les d’Asturies en medio’l restu, ensín destacar y, sigún comprobé, con númberos estremaos sigún el periódicu. Sicasí, la hestoria que vos cuento güei da que pensar sobro la veracidá d’estes cifres y sobro lo estricto de la xestión de la pandemia. Con tol mio respetu a los que trabayen nesto, que nun pueden ser culpables de la falta medios y la mala organización de los sos superiores

En primer llugar, nun me riñais, se qu’ayeri nun escribí. Ya vos toi sintiendo xuxuriar “sedrá por falta tiempu…” con focicos d’a un metru. Pues sí, por falta tiempu, o ganes, o que se yo. Cuesta facese a la idega de pasar quince díis nuna casa de 47 metros cuadraos con tres rapazos, un gatu ya un pexe; ayeri dedicámoslu a la organización ya intendencia. La de coses que pueden llegar a ocurrísenos, nun mos va dar tiempu a toes.

Pero a lo que diba, la crónica del fin del mundiu. Si nun lleisteis Coronavirus I y Coronavirus II tais a tiempu.

La hestoria que vos voi cuntar, seique la escribo en primer persona, nun ye de mio -esclariolo pa nun esmolecer a naide- pero si de daquién que conozo lo bastante comu pa nun duldar de la so veracidá.

Díe 1. Maltar, tose, dolor muscular, afogamientu. Mierda, a que me va pillar a mi el bichu.

Díe 2. 38’5 de temperatura. Va ser que si, que me pilló. O eso o una bronquitis del quince, porque nun soi a alendar.

Die 3. Nun puedo esperar más, esto ye’l bichu seguro. Voi llamar. Pero como soi una persona concenciada nun voi saturar l’un un dos, que nes redes insisten en qu’usemos los teléfonos específicos pal tema. Nun lu topo. Bono si, topo’l d’Andalucía, el de Madrí ya’l de Murcia. Nos mios grupos de wasap compartieron tamién un par d’ellos, pero son d’Euskadi y de nun se onde más. Na, que llamo a emerxencies.

– Bones. Que teo los síntomes del coronavirus…Toos, si. ¿Qué faigo? ¿Que nun salga de casa? val. Oiga, ye que vivo con una persona de peraltu riesgu… ya, ya, que tais saturaos. Que me va llamar un mélicu a lo llargo’l díe, que tome paracetamol y que nun se me ocurra acercame a naide. Pues val.

Díe 4. Nun me llama’l mélicu y esto nun pasa. Aviso nos mios grupos del was, nel trabayu y a conocios. Digoyoslo claro: entá nun se si ye una bronquitis o otra cosa, ya diré informando.

Díe 5. Ensin noticies del mélicu. Llamo pallá otra vegada. La voz que me retruca ta cansá y un pocu fasta los güevos, normal. Repito la información, pero nesti casu la rempuesta ye bien otra

– ¿Tuvo vusté contautu con dalgún enfermu confirmáu?

– Qué yo sepa non.- Pase’l fin de selmana con 25 rapacinos de toa Asturies, asina que ye difícil de saber-

– Entós faiga vida normal, nun s’esmoleza. Si nun meyora llame otra vegada.

A ver comu faigo yo vida normal con esta fiebre. Si lo se voi al cientru salú y a tomar pol culu.

Die 6. Teo de salir a mercar, nun hai otra, algo habrá que comer y dicen que mañana preslla tou. Faigo pacientemente la interminable cola, col carru mediau de coses que nun avezo comer: hamburgueses veganes, comida chino, marmiellaes y brécoli, lo que quedaba nes estanteríes; y una caxa sidre, por si esto s’allarga.

La xente mírame mal cuando toso y toi por soltar l’aliendu a la d’alantre pa que me dexe pasar primero: lleva tal carrapotáu de papel del culo que da que pensar. Conténgome.

Die 7. Vuelvo llamar: toi peor. Que van mandar el mélicu per casa pa facer les prebes. Que nun me mueva.

Díe 8. Nun manden al mélicu

Die 9, güei. Llamo otra vegada al 112. Primero recibo una bronca porque, agora si, hai un númberu específicu pal Coronavirus Asturies. Val más tarde que nunca. Nel númberu nueu (984 100 400) , tornen a faceme toles entrugues. Si, cierto, tengo tolos síntomes. Pero eso da igual.

– Vamos ver, ¿pero vusté tuvo con dalgún enfermu confirmáu?

– Non, que yo sepa.

-Entós ta sanu. Nun hai más que falar. Siga les istruciones xenerales y si ve que s’afuega muncho vuelva llamar. Adios mui bones.

Y asina, siguimos pa bingo.

This work is licensed under a Creative Commons Attribution 4.0 International License.