Asociaciones ciudadanes, aniciatives particulares, clús esportivos… la sociedá asturiana encadarma una rede de solidaridá pa nun dexar a naide atrás

Xixón foi el conceyu más rápidu a la d’encadarmar redes de sofitu. En concreto, los sos barrios más obreros reacionaron con rapidez y al tercer díe de confinamientu dábase a conocer la Rede Solidaridá La Calzada, una aniciativa de La Rede Xixón Oeste cola que tan llocalizando situaciones de necesidá na redolada, cuntando con un equipu de voluntarios del mesmu barriu que faen la compra, baxen la basoria, lleven melecines o incluso dan sofitu moral a persones que, por salú, edá o situación de desamparu nun pueden cubrir les sos necesidaes básiques por si mesmes, teniendo por supuestu munchísimu curiáu cola hixene, evitando’l contautu direutu y respetando toles midies de seguridá.

El so furrulamientu ye prauticamente’l mesmu que’l de la campaña “Nueu Roces Solidariu”, nel que los vecinos s’organicen p’agabitar a les persones que menos medios tengan demientres l’aisllamientu. El so teléfonu de contautu ye’l 668810987.

Tamién dende la fastera Oeste, pero más ambiciosa en cuantes a émbetu d’aición, surde RACA (Rede d’Apoyu y Curiaos d’Asturies), destinada a “cubrir posibles necesidaes que vaigan surdiendo a lo llargo d’esti periodu en tol territoriu asturianu”. Insisten nel fuerte control de los voluntarios, pa torgar ser un factor más de contaxu, y agora mesmo tan en fase d’identificación de necesidaes, polo que si conoces dalgún casu o tas personalmente nuna situación difícil, puedes ponete’n contautu con ellos dende cualisquier conceyu d’Asturies y ellos avisarán al voluntariu más cercanu.

Malque entama coordinando los barrios de Xixón, la rede creada pol Comité pola Amnistía d’Asturies nun descarta la so ampliación a otros conceyos del so Grupu d’Apoyu frente al Covid-19. “Namás el pueblu salva al pueblu”, declaren, convencios de que les soluciones vendrán de la solidaridá pente la xente antes que de la efeutividá de les alministraciones.

En Colunga, ante l’avalancha d’ufiertes de voluntariáu, l’Ayuntamientu ta encadarmando una rede d’apoyu. Los vecinos ufren a quien lo precise aida telemática, telefónica o presencial.

N’Uviéu la movilización surde dende la mocedá de la parroquia de San Pedro los Arcos, que ponen en marca una rede de sofitu a persones de mayor edá, a les que faen los recaos. Otra rede asemeyada ta en camín d’encadarmase en l’Argañosa. Una aniciativa individual ta intentando entamar una rede de voluntariáu nel Antiguo, ufriéndose tamién pa echar un gabitu coles cuestiones de llimpieza de quien nun les pueda facer.

Aparte d’estos grupos, son cientos los asturianos que, a travies de les redes sociales o con cartelos puestos perdayuri, tan ufriéndose a los sos vecinos pa echayos un gabitu. Aparte de les compres, hai quien se presenta voluntariu pa cocinar o llimpiar, profesores que ponen la so esperiencia a dimposición de los escolinos que precisen aida col colexu a distancia, sicólogos que dan consultes on line de baldre pa  los coleutivos más dañaos pola cris, músicos qu’animen a los vecinos pela ventana o persones que, a cencielles, s’ufren pa dar conversación a los que viven estos díes en soledá.

La parte más difícil d’esti llabor solidariu ta na identificación de les necesidaes, polo que toes estes asociaciones nun solo afalen a los que lo necesiten a llamar, sinon que piden a la población que ten sollertes a lo que pasa nel so vecindariu y qu’avisen en cuantes que deteuten una situación de vulnerabilidá que precise ser atendía.

Aparte d’eso, AMPAS, clús esportivos y otros organismos venceyaos a la reciella tan poniendo muncho enfotu en conseguir que los más piqueños lleven bien estos díes, apurriéndoyos idegues pa entretenese y enllaces interesantes pa pasar meyor el tiempu.

Nuria Prendes

This work is licensed under a Creative Commons Attribution 4.0 International License.