Los doce sindicatos d’Asturies, Euskal Herria, Canaries, Catalunya, País Valencià, Islles Balears, Andalucia, Galiza, y Aragón consideren les midies adoutaes pol gobiernu español insuficientes, ya que per un lláu “apliquen un artículu 155 de la costitución que desanicia d’un guelpe l’autogobiernu, afondando más, si cabe, na recentralización del Estáu” y pel otru, en llugar de protexer al obreru y gracies al alcuerdu roblau con UXT y CCOO, permítese la flesibilidá llaboral y los espedientes de regulación o ERTEs
Ante les dimensiones que t’algamando esta cris, la Coordinadora Obrera Sindical COS Països Catalans, la Corriente Sindical d’Izquierdes d’Asturies CSI, CUT Aragón, CUT Galiza, ESK Euskal Herria, Intersindical Alternativa de Catalunya IAC, Intersindical Canaria, Intersindical Valenciana, LAB , Sindicato Andaluz de Trabajadores y trabajadoras SAT, STEI Balears y STEILAS roblen una declaración na qu’apurren una riestra de revindicaciones al Gobiernu d’España en vista de les consecuencies llaborales de la emerxencia sanitaria que carecemos. Nella reclamen un decálogu de midíes correchores en favor de los más febles, acusando al Gobiernu español d’aplicar de manera encubierto l’artículu 155 cola escusa del coronavirus y alvirtiendo de que nun aceutarán «que l@s trabayaores paguemos la cris una vegá más».
Una de les midíes demandaes ye la declaración de servicios mínimos “nun tien xacíu tar ensin salir de les nueses case y qu’al tiempu los trabayaores nos espongamos yendo a trabayar”, soliciten la espublización d’una llista esauta de les midies de prevención a tomar nes empreses y que se faigan cumplir, asina comu la prohibición por llei de dispidos y EREs amás de la garantía de cobru de la totalidá del salariu pa los emplegaos, incluyíos los que carecen un ERTE. Reclamen tamién los gastos militares y destinaos a la monarquía pa gastos sociales y sanitarios
Nel so comunicáu tamién denuncien la situación que se carez nos servicios públicos, de manera especial nos sanitarios y residencies de la tercer edá, recordando que ye la consecuencia de los “sucesivos gobiernos del PSOE y del PP, que trataron l’atención mélica y la prevención non como un drechu global sinon comu una mercancía, xenerando descomanaes ganancies pa les industries farmacéutiques y de salú», amosando que’l modelu económicu fracasó y ye imprescindible avazar faza un modelu nel que la vida de les presones ya’l so entornu se coloque’n primer planu”.
Agradecen tamién el trabayu desendolcáu pol@s trabayaores de la Sanidá Pública, residencies, atención domiciliaria, socio-sanitarios, curiaos, suministros d’agua y enerxía, tresporte, llimpieza, alimentación, farmacies y munchos otros.
Llucía F. Marqués
This work is licensed under a Creative Commons Attribution 4.0 International License.
