En mediu la crís, la solidaridá y la collaboración ciudadana ufren soluciones a la escasez de medios de proteición, pero los intereses económicos dificulten davezu qu’esta aida desinteresada llegue a destín

Ante la escasez de material de proteición nos cientros sanitarios (ayeri nel HUCA los enfermeros utilizaron calces de los pies na tiesta por falta de gorros), son munchos los voluntarios que tan fabricando nes sos cases sustitutos de mazcarines y pantalles proteutores, coles qu’ufrir a los trabayaores del seutor una proteición ante contaxos que los cientros nun yos apurre.

Ayeri recibieron nel Hospital de Cagüeñes una remesa de pantalles fabricaes por voluntarios con impresores 3D y regalaes ensin ánimu de llucru. Según informaciones de trabayaores del cientru hospitalariu, la direición del mesmu procedió darréu a requisar les proteiciones, alegando que nun taben homologaes pero ensin ufrir dengunes otres a cambiu y llegando a interrogar sobre l’orixe de les mesmes, dando a entender qu’esistía un ánimu de llucru y que’l repartu de les mesmes podría costituyir un delitu, seique foren de baldre.

Pa dalgunos de los afeutaos, que se ven forciaos a siguir trabayando ensin proteición, esta reaición por parte de la direición de Cagüeñes namás s’entiende si hai intereses personales por parte de dalgún “amiguin” de los alministradores que viere pelligrar los sos planes de llucrase cola venta de pantalles al hospital.

Redaición InfoAsturies

This work is licensed under a Creative Commons Attribution 4.0 International License.