La reciente midía de controlar los movimientos de la ciudadanía al traviés del so móvil, anunciada comu esceicional pal control de posibles desplazamientos illegales demientres la pandemia, ya se punxere’n práutica va menos de mediu añu, nun ensayu tan oportunu comu difícil de desplicar

El BOE del 28 de Marzu recueye la puesta’n marcha d’un dispositivu de control de xeollocalización al traviés de los teléfonos, una midía controvertía y que pa munchos vulnera’l drechu a la intimidá de los ciudadanos. Los datos recoyeránse al traviés de la rede móvil, non de los satélites, lo que fae balero amatar l’allugamientu del movil.

La midía, que vien acompangada d’una aplicación d’información y autoevaluación del coronavirus pa facela más atrautiva, ye controvertía, por cuantes supón la implantacion d’un control de los movimientos de la población ya una vulneración de la so privacidá, sentando unos precedentes que podíen normalizar esta xixilancia y allargala nel tiempu en pasando’l periodu de confinamientu.

Sicasí, el sistema nun ye nuevu n’España: del 18 al 21 de Payares, ya ensin informar direutamente a los afeutaos, tres compañíes telefóniques (Telefónica, Orange y Vodafone) apurrieron al INE datos sobro los movimientos de los sos veceros, proporcionando información sobre la posición de los móviles pente les 12 la nueche y les 6 de la mañán y dende les 9 a les 18:00, en dies llaborales, y les 24 hores en festivos y vacaciones, incluyendo nesta categoría los díes de Nuechibona y Viéspora de Reis.

Nuria Prendes