La non prestación del material afayaizu pa prevención de riesgos nel trabayu conlleva fuertes multes y condergues de cárcele d’ente 6 meses y tres años
Les denuncies por falta de materiales de proteición contra’l contaxu de l’andanciu son continues dende l’entamu d’esta crís sanitaria y algamen a prauticamente tolos seutores que continuaron col so furrulamientu de magar l’entamu del confinamientu.
El casu más evidente ye’l de los trabayaores de los cientros sanitarios: personal mélicu, enfermeros, personal de llimpieza y caltenimientu, celaores, alministrativos… nos hospitales y cientros de salú los EPIs rellumen pola so ausencia y son ya virales les semeyes de trabayaores protexéndose con bolses de basoria y mazcarines inapropiaes. Los contaxos nesti seutor medren esponencialmente, neto que nos supermercaos, onde les midies de proteición, aparte d’insuficientes, aportaron sero, cuando ya sumaben dellos contaxos. A les curiaores a domiciliu de persones dependientes torgóse-yos l’usu de mazcarines “por dir contra’l reglamentu”, los carteros y repartiores a domiciliu vense forciaos a dir de casa en casa ensin proteición demientres tola cuarentena y son abondes les empreses -munches d’elles de seutores non esenciales- nes que se denunció la imposibilidá de guardar siquier la distancia de seguridá.
A la responsabilidá ética de los xestores de toos estos servicios públicos y empreses privaes, súmase la responsabilidá llegal pol delitu de pelligru recoyíu nel artículu 316 del Códigu Penal español:“Los que con infración de les normes de prevención de riesgos llaborales y tando llegalmente obligaos, nun faciliten los medios necesarios por que los trabayaores desendolquen la so actividá coles midíes de seguridá ya hixene afayaices, de forma que pongan asina en pelligru grave la so vida, salú o integridá física, van ser castigaos coles penes de prisión de seis meses a trés años y multa de seis a dolce meses”.
Intúyese que nun se va aplicar.
Llucía F. Marqués
This work is licensed under a Creative Commons Attribution 4.0 International License.
