“Nun vaiga pasar, dicho con pallabres llanes, que Barbón seya comu ún d’esos paisanos, qu’a lo grandono, quier pagar una ronda pa toos cuandu nun tien pa pagar lo d’en casa”

Dende la organización nacionaliega, que yá tinía en marcha una campaña pidiendo recursos pa la Sanidá Pública Asturiana dende anantes de producise l’actual cris sanitaria, reconocen el calter hestóricamente solidariu de los asturianos y ven afayaiza la idega d’atender, llegáu’l casu y cuntándose colos medios pa ello, atender xente foriato nos hospitales asturianos. Sicasí, acusen al Gobiernu’l Principado d’engañar a la sociedá asturiana y consideren l’actitú de Barbón un actu de propaganda y despiste col que’l presidente fae por que nun se fale  sobro la eficacia o non de la so política sanitario, nin de si los fallos que se dan tienen o non responsables políticos.

“La Sanidá Pública Asturiana nun cunta colos suficientes recursos básicos non yá pa garantizar la meyor atención mélica a los pacientes, sinón nin siquier pa dotar al presonal sanitariu de los materiales que-yos garanticen la necesaria preservación de la so salú. Los escelentes profesionales de la Sanidá Pública Asturiana denúncienlo de contino: nun hai suficientes mazcarines, equipaciones EPI, pantalles proteutores, tests deteutores… nin suficiente presonal sanitariu. Que dalgunos sanitarios tuvieren de trabayar improvisando proteiciones con bolses de basoria ye una rialidá tan heróica comu vergoñosa” declaren, destacando la incongruencia de presumir de capacidá d’atención hospitalaria al tiempu que se manden pa casa a enfermos declaraos a los que se-yos fae un seguimientu a distancia, ensin drechu a ingresu hospitalariu ya ensin contabilizar. piden tamien desplicaciones polos motivos polos qu’hai tantes presones mayores enfermes confinaes na rede xeriátrica, tamién ensin drechu a ingresu hospitalariu.

Los datos oficiales d’enfermos y fallecíos nun son riales, munchos enfermos con síntomes non graves que tán en casa y nun cunten nes estadístiques oficiales ya’l gobiernu’l “Principado” nun tien los tests necesarios, non yá p’atender a la población asturiana que lo necesite, sinón p’asegurar el necesariu control de contaxos ente presonal sanitariu y curiaores de tou tipu (hospitales, atención primaria, tresporte sanitariu, residencies de tercer edá, curiaores a domiciliu…).

La OMS aconseya una política integral (prebes de deteición, rastréu de contautos, cuarentena y distanciamientu social, dotación suficiente de la sanidá, etc.) y avisa de que sólo col confinamientu nun se va reducir la curva de muertes por coronavirus. Esta política integral contrasta coles polítiques ultralliberales defendíes pol PSOE y recomendaes pola UE ya’l FMI anantes de l’actual cris: retayos presupuestarios, salarios insuficientes, derivación de pacientes a centros sanitarios non públicos, falsiamientu de les llistes d’espera, penosa cobertura d’ausencies, permisos y vacaciones, recorte plantilles, mengua grave del númberu mélicos sobro too en delles especialidaes, aumentu risible de les places pa estudiantes na Facultá Melecina, cantidá ruina de places de formación MIR nos hospitales asturianos, falta de política dala p’atayar la influyencia de la industria farmacéutico sobro l’actividá de la sanidá público, etc.

Redaición InfoAsturies