Nun se dirá que la ilesia nun fae por curiar del so rebañu nestos tiempos d’andanciu. Non, nun donaron un céntimu nin tresformaron entá les ilesies y seminarios n’hospitales y ye cierto que se dieron casos d’abandonu de vieyos nos xeriátricos dirixios por monxes, pero nun seyais repunantes, ellos faen daqué muncho más emportante, imprescindible pal país y a xulgar polo visto, almitio pente les actividaes esenciales con permisu pa exercer: dar misa

Ayeri foi Domingu de Ramos, entamu la cellebración de raigañu paganu que cellebra l’aniciu la primavera y que la ilesia católica remanó pa si comu fexo con bona parte de los ritos precristianos, convirtiéndolu nel entamu la Selmana Santa. Esta selmana ye tamién fecha d’abrir los toneles de sidre n’espiches y xuntase pa tastiar la primer sidre l’añu. Sicasí, toi cierta de que veremos más “fieles” y cures desobedeciendo les restriciones que sidreros siguiendo la tradición, y non por falta de pasión, doi fe d’ello, sinon por xacíu. Y porque nun mos dexen.

De fechu ya saltaron a les redes imáxenes de mises clandestines, en templos y al aire llibre; por exemplu, na Tenderina (Uvieu), onde la Hermandad de los Estudiantes, organización mui quería polos incondicionales del antiguu réxime y señaldosos del facismu, cellebró una gayaspera misa de Ramos con participación d’alrodiu de 12 persones, tocando les trompetes comu bonos anunciadores del fin del mundiu y agravando la situación col himnu d’España al altu la lleva.

El mesmu díe, en Cuadonga, cures y monxes aconceyaron pa rezar -sigún se ve nes semeyes de la prensa oficial- ensin distancies de seguridá, mazcarines nin llimitaciones al movimientu. Barrunto que tendrán proteición divino y que con eso valdráyos pa nun se contaxar pente ellos nin esparder víruses nel so dir y venir; y tendrán tamién proteición castrense, porque a ellos nun yos gutien y si yo salgo del portal de casa teo a toles fuercies de seguridá asegurándose de que faiga la compra dientro los parámetros llegalmente permitios.

En munches otres ilesies retrasmitieron la misa a distancia, porque ta nidio que ye una actividá esencial ya indisensable pa la sociedá asturiana, que nun pue detenese por un simple andanciu.

Toi naguando porque aporte’l xueves ¿Espicharán los llagares la so sidre, por supuesto en petit comité, pa los más averaos? ¿Retrasmitirán nes teles la tastia de la sidre nuevo? ¿y el vienres? ¿Qué pasa col Sidracrucis? ¡Quiero vivir la mio pasión! Reclamo pa los fieles de la Ilesia la Sidroloxía los mesmos drechos que pa los católicos. Queda dicho.

Nun vos perdais Hestories del Coronavirus I, II, III, IV, V, VI, VII y VIII

Llucía F. Marqués

This work is licensed under a Creative Commons Attribution 4.0 International License.