Los dos colexos profesionales de l’abogacía asturiana (el d’Uviéu ya’l de Xixón) vienen d’emitir un comunicáu conxuntu nel que refuguen la totalidá del “primer documentu de trabayu sobre medies organizatives y procesales pal plan de choque na Alministración de Xusticia tres l’estáu d’alarma”, ellaboráu pol Conseyu Xeneral del Poder Xudicial español, por costituyir una fonda reforma llexisllativa y xudicial que vulnera’l drechu de defensa

Acordies l’analís fechu polos abogaos asturianos, lo recoyio nesti documentu afeuta al drechu a la tutela xudicial efeutiva, pudiendo vulnerar el drechu de defensa, al tiempu qu’entorpez y dificulta l’actividá profesional de l’abogacía. “Al CGPX paez importa-y más l’amenorgamientu de la so carga de trabayu, ensin analizar si ello merma, y en que gráu, el drechu de defensa de los ciudadanos al suprimir trámites o al condicionar l’exerciciu d’esi drechu. En sin dubia, tien de prevalecer el drechu de defensa de los xusticiables” declaren los abogaos nel so comunicáu.

Refiérense en concretu a midies comu la menacia de multar a los defendios con fasta 3.000 euros si s’estima inxustificada la postura procesal adoutada, o la que llimita la estensión de los escritos allegatorios.
Na mesma llínea  consideren improcedente que s’amplíe l’ámbetu oxetivu del xuiciu verbal en detrimentu del más garantista xuicio ordinariu o que se llende l’acesu a determinaos recursos aumentando’l llímite cuantitativu de magar el que se pueden interponer.
Pente otres cuestiones, el plan impón l’Habilidá del Mes d’Agostu, lo que na práutica implica la negación de vacaciones pa los profesionales de l’Abogacía, especialmente nos despachos con menor númberu de componentes.
Pa finar, echen en falta na propuesta un plan que resuelva el problema que va a xenerase na plataforma LEXNET, al ser previsible un colapsu de la mesma pola inxente cantidá d’escritos que se presentarán cuando s’alce la suspensión, pa lo que proponen que la presentación pueda facese previamente o con posterioridá pero calteniendo la fecha del díe en que s’habiliten los plazos xudiciales.

Poro, presentaron estes allegaciones y la refuga al documentu nel muerganismu correspondiente pa ello, el Conseyu Xeneral de l’Abogacía española.

Redaición InfoAsturies

This work is licensed under a Creative Commons Attribution 4.0 International License.