L’Autopista del Güerna, a la que Francisco Álvarez-Cascos amplió la concesión dica l’añu 2050, podría ver ampliáu’l so plazu otros siete años y mediu, mui cerca del tope máximu llegal de 75 años de concesión pa una autopista, hasta’l 2057
La sociedá asturiana lleva décades desixendo la liberación de l’autopista del Güerna, un auténticu pilancu pa les comunicaciones pente Asturies y España qu’aislla xeograficamente y castiga económicamente a los tresportistes y viaxeros del país. Sicasí, Aucalsa, la empresa xestora de la mesma, sedrá de les poques empreses que nun carecerá -por llei- les consecuencies del frenazu n’actividá económica’l país.

Ente les midíes estraordinaries adoutaes pol gobiernu d’España’l 17 de Marzu pa faer frente al impactu social y económicou’l coronavirus figura la proteición de los intereses económicos de les empreses concesionaries:
“Les midíes adoptaes pol Estáu, les comunidaes autónomes o l’Alministración llocal pa combatilo [al Coronavirus] van dar drechu al concesionariu al restablecimientu del equilibriu económicu del contratu», señala espresamente nel artículu cuartu del decretu llei, al aludir a los drechos reconocíos nes concesiones d’obres y servicios públicos.
Arriendes d’ello, l’autopista del Güerna nun va poder ser deficitaria y pa ello contemplen dos opciones: o bien va recibir más ingresos de l’alministración pública o va ampliase’l tiempu de la so concesión un 15%, lo que nesti casu implica que los asturianos siguiríamos pagando peaxe hasta 2057. Tamién podría contemplase un cambéu nes clauses económiques del contratu, ello ye, podríen xubise entá más los peaxes, que yá son los más elevaos del estáu.

Nuria Prendes

This work is licensed under a Creative Commons Attribution 4.0 International License.