Van viéndose per Asturies los primeros trapos colloraos nes ventanes, nun vos faigais ilusiones, nun ye que te medrando la concenxa de clas. Un niki, un rodillu, un pañuelu anuedau, lo importante ye’l collor; y lo qu’implica

Dientro d’esa casa vive una familia (o una persona) que nun tien pa comer. Esti sistema, importáu dende América del Sur, ye la forma de pidir ayuda, a los vecinos o a los pocos transeúntes que pasen per delantre, camin del trabayu o la compra semanal. Un S.O.S dende la botella na qu’una xente ensin medios busca facer aportar daqué a la so islla.

Ye que por muncho que salgamos antroxaos a la ventana a facer vermús y echanos culinos nun podemos escaecer que 148.000 asturianos vivíen ya en probitú severa y que’l 21% de la población taba na llende la miseria anantes d’esti andanciu, que los que fueron pa casa con un ERTE nun cuenten cobrar fasta’l mes qu’entra, que los y sobre tou les trabayaores que vivíen de la economía somorguiada quedaron más que naide nel aire, que los que ganaben güei pa comer mañana nun pudieron facer reserves y les despenses van escosando…

Entantu, la famosa renta mínima nun dexa de ser una promesa futurible que, con suerte y si se xestiona rápido, aportará cuando llevemos cerca dos meses empresllaos y algamará pocu más que pa pagar los retrasos del alquiler y la llume.

Asina que la xente ta escolingando trapos colloraos nes ventanes y quienes los ven lleven xinta o avisen en dalguna de les munches redes de solidaridá y páxines de Facebook que se tan encargando d’estes coses.

Por suerte los trapos nun duren muncho puestos, el pueblu sigui salvando al pueblu.

This work is licensed under a Creative Commons Attribution 4.0 International License.