Los caberos datos d’afiliación a la Seguridá Social n’Asturies recueyen un primer averamientu a les consecuencies llaborales de la cris: 11078 cotizantes menos, 16.604 afeutaos por ERTES ya un númberu indeterminau d’autónomos en quiebra

L’informe de Marzu ye’l primer indicaor disponible de la llaceria que se vía venir. Marzu -un mes xeneralmente positivu no que cinca a creación d’emplegu- preslló con 352.391 cotizantes a la Seguridad Social, 11.078 menos que nel mes pasáu y la cifra más baxa nos caberos tres años. Estos datos nun recueyen a los trabayaores afeutaos por ERTES (suspensiones temporales d’emplegu), situación na que s’alcuentren por agora 16.604 trabayaores vinientes de les 4.550 empreses que ya tramitaron el so espediente, cifra en continuu xorrecimientu porque otres 5.425  tan pendientes de tramitación.

Estos datos caen sobre una Asturies fondamente perxudicá por décades de polítiques de desaniciu que finaren col texíu socioeconómicu del país, especialmente no que cinca a los seutores primariu y secundariu, faciendo’l mercáu llaboral dependiente del seutor más vulnerable a cualisquier variación de les condiciones col so apueste pol turismu y la hostelería.

Malque tolos seutores menos el sanitariu pierden emplegu, los más afeutaos son servicios y costrución, nos que pente dispidos y finalizaciones de contratos temporales desanicióse un de ca diez puestos, siendo en xeneral más acusáu l’amenorgamientu de cotizantes homes (-6.641; -3,5%) que de muyeres (-4.617; -2,6%); sicasí, esti datu tien de ser manexáu con pricuru, una bones que les muyeres tienen una peralta participación na economía somorguiada, polo que la so perda de trabayu nun queda rexistrada.

This work is licensed under a Creative Commons Attribution 4.0 International License.