Considerando la emportancia de la Cultura comu seutor estratéxicu pa caltener l’ánimu y les graves consecuencies que ta teniendo la paralización de la vida “normal” nel ámbetu cultural, la Conseyería de Cultura, Política Llingüística y Turismu del Gobiernu del “Principado” entama una convocatoria pa la creación y alquisición de drechos d’esplotación de 50 pieces audiovisuales realizaes por artistes, investigadores y creadores artísticos asturianos. El plazu pa presentar los proyeutos tará abiertu dica’l 20 d’Abril de 2020 a les 14:00 hores
El proyeutu ñaz baxo’l nome “Asturies, Cultura en Rede”, ya’l so envís puntual ye l’espoxigue de la ufierta de programes culturales de calidá puramente asturianos de los qu’esfrutar nes peculiares circustancies d’esti intre. A más llargu plazu, prentende también averar a la ciudadanía’l díi ente díi d’artistes, investigadores y creadores culturales d’Asturies.
Una bones s’escueyan los 50 proyeutos, los participantes tendrán 5 díes pa grabar una pieza na qu’amuese’l so procesu creativu, acompangando de dalguna amuesa del mesmu. Trátase de “recoyer nuna grabación los pasos que da pa preparar o ellaborar el trabayu, qué ye lo más importante que tien en cuenta, qué tien d’especial y cualquier reflexón al respetive”.
El proyeutu final va tar compuestu por mediu centenar de vidios fechos dende casa, nel que los artistes asturianos amosarán el so proyeutu creativu en direutu,
un percorríu audiovisual que xunirá nuna web el mundu les artes plástiques, el cine, la lliteratura, la música, el teatru, la danza y el patrimoniu, dexando descubrir la cultura asturiana dende dientro y de la man de los sos creadores y espertos. Les obres escoyíes repartiránse por igual pente les artes plástiques, la lliteratura, el seutor musical ya’l cine, atendiendo a los criterios de orixinalidá y calidá téunica y artística.
El plazu pa presentar los proyeutos fina’l 20 d’Abril y la decisión fadráse pública’l 22, teniendo qu’apurrir los vidios anantes del 28 del mesmu mes. Los autores de les pieces audiovisuales que s’escueyan cederán n’esclusiva les sos obres, qu’anicialmente van espublicase en canal youtube o vimeo pa ensertase na web “Cultura en rede”, pero que tamién podrán ser divulgaes o espuestes n’otres páxines web, espublizaciones, en llugares públicos, edificios y cualesquier otru tipu de mediu o soporte físicu o dixital. La remuneración económica poles obres sedrá de 250 euros.
Redaición InfoAsturies
This work is licensed under a Creative Commons Attribution 4.0 International License.
