La medría más alta correspuende a la de les mandarines en Marzu, un 46% de guelpe, pero los sos precios nun apararon ehí y n’Abril sigue xubiendo. Les asociaciones de consumidores denuncien qu’esto ta siendo namás l’entamu, porque’l seutor primariu ya alerta: la falta de man d’obra y les esplotaciones paralizaes pol coronavirus tan faciendo perder collecha, especialmente nes grandes plantaciones de fuera d’Asturies, de les que depende bona parte del soministru a supermercaos. Al mesmu tiempu, la falta de canales afayaizos pa la venta de los productos propios ya’l preslle de los mercaos dificulten la llegada al consumidor de los productos del país.

Verdures y frutes son les que mayor xorrecimientu de precios rexistraron, pero la carne tamién se vio afeutada: un 6’4% más caro la de gochu, el 2,5% en nel pitu y 1,8%nel coneyu, precisamente les carnes más económiques. Los güevos subieron un 3’5%. En xeneral, los que más espoxigaron foron los precios de los productos de primer necesidá, de los que tamién desapaecieron ufiertes y promociones ya que, col consumidor obligáu a mercar al par de casa, dexa de ser una prioridá atrayer veceros. A ello súmase’l desabastecimientu que dexa ermes les estanteries de determinaos productos -los más asequibles- entantu otros de más preciu ven averase la fecha de caducidá ensin ser compraos.

Nuria Prendes