Tolos gobiernos del mundiu declararon de calter esencial el trabayu de los repartidores d’apps móviles (Deliveroo, Uber Eats, Glovo, Rappi, PedidosYa…) demientres la cris, pero pa ellos nun hai aplausos nin consideración: lo mesmo reparten pizzes en puertes con arcu la vieya que lleven un pintallabios d’urxencia a un décimu pisu. Trabayaores d’Asturies, Arxentina, Perú, Guatemala, España o Costa Rica aparen güei pa denunciar la so precarización estrema y apelar a la concenxa ciudadano en vista de la inaición de los gobiernos y l’ausencia de lleis regulatories

Les condiciones llaborales d’estos repartidores, la mayoría contrataos comu falsos autónomos, vienen siendo denunciaes los caberos años. Cola cris del andanciu non solo nun cobren más pola peligrosidá del so trabayu, sinón que de fechu dalgunes compañíes, comu la plataforma de repartu a domiciliu Glovo, tan baxando la tarifa base de los sos repartidores a la metá, de 2’50 euros por repartu a 1’25.

Les empreses nun entreguen material de proteición a los repartidores y les úniques midies de seguridá que recibieron foi un vidiu desplicando comu facer les entregues ensin contautu, recomendando dexar los paquetes a unos metros de la puerte y nun utilizar los ascensores.

Los ciclistes de repartu son fasta agora l’únicu coleutivu en manifestase nel estáu español baxo l’estáu d’alarma, depués de la concentración en bicis que percorrió Madrí el pasáu 16 d’Abril. N’Asturies güei sedrá’l primer díe de protesta y los repartidores nun tarán disponibles a lo llargo tol díe, siguiendo l’aniciativa internacional ñacía n’Arxentina

La organización Riders x derechos, una de les que sofiten la füelga, anunció nun comunicáu la so disponibilidá p’apurrir sofitu xurídicu a cualisquier compañeru que seya identificáu, multáu o sancionáu pola parte de les empreses o autoridaes por exercer el so drechu a revindicar unes condiciones llaborales dignes.

Nuria Prendes