Ye un arguyu y una satisfación facer recuentu d’asturines y estanqueres na mio cai. Diga lo que diga el Sr. Canteli nesta piqueña cai d’esti barriu obreru de Xixón, la bandera del Reinu d’España tien pocu que facer

Depués del llamáu del alcalde d’Uviéu a poner estanqueres nes ventanes y balcones salgo a facer la compra. Faigola nes tiendes piqueñes del barriu, procuro esquivar supermercaos y cientros comerciales porque entá me furrula la memoria y nun va tanto que taben les sos emplegaes denunciando la so precariedá llaboral. Asina qu’empobino pa la frutería; teo suerte, teo toles tiendes que preciso en dos cais.

Caleyo despistá, creo que mos pasa a toos, comu con cierta priesa y pasmu, especie rara enguantada pente pasiantes de perru. Voi pensando en Canteli, na so puñeflera obsesión españolista megalómana, y miro p’arriba. Nun hai banderes d’España. Hai cintes azules y marielles de ventana a ventana, que se punxeron el díi de la espicha, y asturines.

Munches asturines. Cuento 17 banderes d’Asturies y una bandera l’Sporting namás na mio cai, otres 5 nel curtiu trayeutu de la mio cai a la frutería. Nun soi quien a sacar semeya a toes -el móvil ye una patata y la xente mírame raro- pero unes cuantes, la mia incluyía, si que podeis veles.

Tampocu voi presumir más de lo necesario, cuando lo del fúbol sí que les hebio, pero esto ye estremao. Tampocu voi presumir de ciudá, quiero creer qu’hai asturines fuera de Xixón, fuera’l Natahoyo, una marea azul d’amor propiu. Namás vos digo esto, no que a nos respeuta, Canteli  cero, asturines 17. Les conclusiones que les saque caún.

Nun vos perdais Hestories del Coronavirus I, II, III, IV, V, VI, VII, VIII, IX, X, XI, XII, XIII,  XIV 

y XV

This work is licensed under a Creative Commons Attribution 4.0 International License.