Los trabayaores acusen al gobiernu  “Si nun s’enteraron de la operación, ye que tenemos un Gobiernu d’ineptos; si, en cambiu, lo supieron, ye que son unos sinvergoñes“

La venta d’ALCOA al fondu d’inversión suizu Parter Capital Group y la so tresformación n’Aluibérica AVL vendióse a los trabayaores comu una solución al preslle definitivu que la empresa plantegaba pal 2019. Cola operación, consiguióse tamién finar con una de les movilizaciones más multitudinaries en defensa l’emplegu y la división de los trabayaores, que confiaron nesta opción, ya que’l procesu fore “tuteláu” pol Ministeriu d’Industria Español, el “Principado” y la Xunta Galicia.

Con esta transación, de la que nun trascendió contratu, Alcoa llibróse de pagar les indemnizaciones a los trabayaores y los respeutivos gobiernos de tener qu’enfrentar la movilización d’un coleutivu que cuntaba col sofitu de tola sociedá asturiana.

L’añu pasáu la factoria d’Avilés ya paralizó la fabricación d’aluminiu primariu, llendandose a la fundición de chatarra pa la obtención d’aluminiu secundariu y les inversiones prometies pa la reactivación de la planta nun llegaron a dase enxamás. Diba quedando nidio que’l fondu d’inversión Parter nun tinía proyeutu industrial pa ella.

La reventa al grupu Industrial Riesgo -del qu’hai series dudes respeutu a la so solvencia-  a espaldes del restu les partes implicaes del 74% del capital d’Alu Ibérica ya ensin que trascendiere’l preciu de la transación incumple l’alcuerdu robláu con Alcoa..

Tres de Riesgo alcuéntrase la empresa del  magnate ucranianu Rinat Akhmetov, System Capital Management, que ficiere fortuna cola desnacionalización de la época soviética y con privatizaciones de la época Yanukovych. La empresa fore descartada de les candidatures nel procesu abiertu por Alcoa por nun considerase viable.

Los trabayaores  desconfien d’estes maniobres de grandes financieres y empreses multinacionales y temen que se te aplicando a la so empresa la estratexa de preslle paulatín al traviés de sociedaes d’inversión que nun tienen dengún enfotu en reactivar les fábriques, la mesma que Tenecco aplicó en Xixón cola venta de la so planta al grupu Vauste, y que s’ensierta perfechamente nel camín de desindustrialización d’Asturies al que lleven les polítiques de les caberes décades.

Acusen al gobiernu d’España, d’Asturies y de Galicia de vendelos a “unos trileros” a costafecha, traicionando la so confianza, ya que de nun ser asina taríen dando amueses d’una ineptitú inasumible. De fechu, tres de la reciente reventa reconocieron “desconocer la compra”

Llucía F. Marqués

This work is licensed under a Creative Commons Attribution 4.0 International License.