La Conseyera de cultura remanó nel parllamentu un documentu incompletu qu’esclúi’l prerrománicu, pesi a cuntar dende hai más d’un añu cola información completa apurrida pol Colexu de Rexistradores

El Grupu de Inmatriculaciones Asturies y la coordinadora estatal RECUPERANDO, que vienen solicitando la información de los bienes inmatriculaos pola ilesia en Asturies dende principios del añu 2018 al traviés de la Comisión de Pidimientos y Drechos Humanos de la Xunta Xeneral, consideraron nel so momentu que la información al respeutu unviada pol decanatu de los Rexistros de la Propiedá de Asturies yera “una auténtica tomadura de pelo”. Esa información consistía en “una única fueya a doble cara na que figuraben 26 bienes, polo xeneral inidentificables, ensin indicar nin direición nin descripción”.
Con esa llista, que nun inclúi los monumentos del prerrománicu, ye cola que Berta Piñán, Conseyera de Cultura, compareció va un mes nel parlamentu para afirmar que “nun hai evidencies” de la inmatriculación de los bienes del prerrománicu. Al paecer esiste otru inventariu, actualizáu y completu, apurríu pol Colexu de Rexistradores de Asturies en Febreru del 2019, un llistáu refechu de les inmatriculaciones de la Ilesia católica en Asturies, nel que se demuestra la magnitú del espoliu  y qu’inclúi la práutica totalidá de l’ayalga arquiteutónica’l prerrománicu.
La llista completa, de la que nun trescendieron datos concretos pero que siquier dobla l’anterior en númberu d’inmuebles afeutaos, ta en manos tantu del Principáu” como’l gobiernu d’España dende fai más d’un añu.

El Grupu de Inmatriculaciones d’Asturies solo ve dos posibles desplicaciones a esta situación: o bien la descoordinación ya ineficacia de los gobiernos ye tan grande como pa que, tres dos pidimientos a la Xunta de Gobiernu, entevistes con dos direiciones xenerales, cuatro entrugues parllamentaries y les sos correspondientes rempuestes, naide fuera quien a indicar la esistencia d’esa información, unviada a la Conseyería de Xusticia, o bien esiste una nula voluntá d’encarar el tema les inmatriculaciones de la ilesia y escuéndese a los ciudadanos la información qu’esiste (y de la que se dispón) sobre les mesmes.
El Grupu de Inmatriculaciones d’Asturies trabaya intensamente dende va años pa esclariar el marayu d’ inmatriculaciones de la Ilesia, coles mires de llograr la nulidá de toles iscripciones por supuesta inconstitucionalidá y restituyir aquelles que puedan pertenecer al padremoñu públicu, como ye’l casu del arte prerrománicu.

Llucía F. Marqués