Pesi a l’escasu reconocimientu de l’alta capacidá, Asturies destaca nel segundu puestu l’estáu en cuantes a mayor porcentaxe d’identificaciones, presentando una de les meyores evoluciones del estáu
Albidrase qu’al menos un 2,28% de la población tien altes capacidaes inteleutuales. Namás un 0,95% tan diagnosticaos comu d’Altes Capacidaes n’Asturies. Ello implica que la gran mayoría nun tan deteutaos y remanen “invisibles” dientro d’un sistema educativu que, sigún denuncien les families, tampocu atiende les sos necesidaes una bones son identificaos.
Un total de 1.293 escolinos asturianos tan oficialmente diagnosticaos comu d’AACC y, poro tendríen de recibir una atención específica en función de les sos necesidaes educatives especiales (NEE). La evolución ye pergrande, de magar los 329 llocalizaos nel añu 2.011, pero siguen siendo munchos los que queden descolgaos, un 90’5%. Los espertos achaquen estes cifres a dos motivos intrínsecamente xunios: el desconocimientu ya’l miéu, sumaos a la neglixencia de los profesores ya cientros educativos, que ye denunciable si ye voluntaria.
La llexislación recueye la importancia de la identificación y la necesidá d’atención educativa específica d’estos escolinos por parte l’Alministración pública: “Correspuende a les Alministraciones educatives adoutar les midíes necesaries pa identificar al alumnáu con altes capacidaes inteleutuales y valorar de forma temprana les sos necesidades” (LOMCE 8/2013 art. 72).
Una vegada identificaos y diagnosticaos, les families denuncien lo escaso, erroneo o inesistente de les midies adoutaes por parte de los cientros, lo que deriva en que, incluso col informe na man, un cincuenta por cientu de les mentes más rellumantes del país protagonicen casos de fracasu escolar y abandonu de los estudios.
Sicasí, les cifres asturianes rescamplen comu positives dientro de les recoyíes nel estáu español, que tien ensin identificar el 95’7% de la so reciella más talentosa, con 6 comunidaes perbaxo del 0’2% de diagnósticos. Amás, Asturies caltién una curva positiva no que cinca a evolución de les identificaciones, con un incrementu del 19% nel caberu añu, frente a la meyora de namás el 4% n’España, con delles comunidaes en nidiu retrocesu.
Llucía F. Marqués
This work is licensed under a Creative Commons Attribution 4.0 International License.
