Mentes el “Principado” entá nun fexo un res –nin s’espera- el gobiernu vascu vien d’aprebar aídes por 50 millones d’eruos a los llagares vascos p’amenorgar los efeutos del coronavirus

Pesia les demandes del seutor sidreru asturianu, el “Principado” non solo nun toma denguna midía pa sofitalu, sinon que se ñega a aconceyar pa tratar del tema, talo como reiteradamente vien pidiendo por exemplu l’Asociación de Pumareros d’Asturies.

Fasta agora lo único que fexo foi aconceyar cola DOP Sidre d’Asturies -que llóxicamente namás representa a una minoría de llagares- pa tratar de la promoción de la mesma, pero ensin llegar a dengún compromisu, quedando too na avezada declaración de bones intenciones, pero ensin concretar un res.

Por embargo, el gobiernu vascu vien d’aprobar aídes por valor de 50 millones d’euros pa los llagares vascos cola fin d’amenorgar el dañu prevocáu pol andanciu del coronavirus. Unes aídes que contemplen ente otres midíes la puesta en marcha d’un portal de comercialización pal conxuntu de llagares vascos o bonos de sofitu a la innovación comercial.

Pero nun ye namás esto, les Diputaciones d’Araba y Gipuzkoa tamién cunten con presupuestu y programes p’aidar a los llagares y a los pumareros de les sos respeutives provincies, pa paliar los efeutos prevocaos pol coronavirus.

Frente a ello, la inoperancia del “Principado” queda una vuelta más n’evidencia, y dexa al conxuntu del seutor sidreru asturianu al debalu, en pallabres d’Andecha Astur “Esa ye la desemeyanza ente tener un gobiernu propiu, y un “Principado” impuestu dende Madrid… y a los asturianos salmos caro, mui caro”

Vitor Corte

This work is licensed under a Creative Commons Attribution 4.0 International License.