La conseyería aporta a la Mesa Sectorial de Negociación d’Ensiñanza Pública con un documentu ya redactáu, ensin opción de negociación, que ye refugáu por tolos sindicatos

Ayeri, por primer vegá dende que’l nuevu equipu se fexo cargu de la Conseyería d’Educación -va pa un añu- tuvo llugar el primer conceyu de Mesa Sectorial de negociación d’Ensiñanza pública, l’únicu marcu llegal reconocíu pa tratar les cuestiones venceyaes a les condiciones llaborales del personal docente. Nun se convocare conceyu nin siquier magar les peresceicionales circustancies derivaes del andanciu, reclamación repitía nos caberos meses polos docentes asturianos, malque sí qu’hebio conceyos secretos con representantes de los colexos privaos.

Nesti tiempu la Conseyería informó a traviés de la prensa, aconceyó cola patronal de la escuela concertada, tomó comu interlocutores a los comités de direición de los centros educativos, que ye un organismu inexistente en términos llegales, tou salvo convocar la Mesa Sectorial y negociar colos sindicatos.

Ante la inesistente voluntá por parte de l’Alministración de convocar la Mesa Sectorial de Educación, toles organizaciones sindicales presentes na dicha Mesa solicitaron aconceyase por Rexistru el pasáu 26 de abril.

Trescurríu cerca d’un mes convocóseyos p’ayeri, ensin que nel orde del díe apaeciere dengún de los puntos presentaos polos sindicatos. Por contra, la Conseyería apaeció al conceyu con un documentu cientráu nos pasos a dar demientres la desescalada – fase 2, que ya fore presentáu n’otros ámbitos y que sigui incluyendo les incongruencies y deficiencies ya denunciaes por SUATEA.

Pa esti sindicatu, el xuegu de la Conseyería ye “facer usurpación de funciones a la Mesa Sectorial porque asina evita falar de lo fundamental, la preparación de les condiciones pal aniciu del cursu 2020-21 en términos de midies de seguridá, distanciamientu social, ratios nes aulas, refuerciu de plantiyes, refuerciu de financiación necesario, etc.”

Nel documentu refugáu por toles fuercies sindicales la Consejería descarga la toma de decisiones, y poro l’asunción de responsabilidaes nos equipos direutivos, faciéndolos responsables non solo de xestionar esti abegosu fin de cursu, sinón d’organizar una desescalada arriesgá regulando la torna a los centros, la compra de material de proteición a cargu  los ya ruinos presupuestos de los cientros, la reincorporación del profesoráu ya’l so horariu d’atención al escolináu, la organización de los espacios, etc.

Dende SUATEA insisten en que consideren que nun se dan les condiciones sanitaries pa la vuelta a la ensiñanza presencial “Ye una midía imprudente, mesmo temeraria, porque nun podrá garantizar la salú de la comunidá educativa, y por estensión, de tola ciudadanía”.

Redaición InfoAsturies

This work is licensed under a Creative Commons Attribution 4.0 International License.