Al entamu l’andanciu, los vecinos de Ribadeo  presllaron el pasu a los asturianos. Agora el comerciu gallegu echa’n falta al veceru asturianu y les redes arden colos comentarios de los vecinos d’A Veiga 

“Si quieren que subsistan les nueses tiendes y la nuesa hostelería tienen qu’abrir les fronteres”, pidin los comerciantes del conceyu gallegu, que ven comu les sos ventes nun algamen les cifres anteriores al empreslle pola falta de los veceros asturianos. Ente estes pallabres, los vecinos d’A Veiga retruquen darréu con contundencia: “Deseguida vos encargasteis de poneros na entrada pa echanos, espero que vos alcordeis de lo que ficisteis y preslle tolo que tenga que presllar” declara un vecín. Pesi a que nel conceyu de Ribadeo moren más de 10.000 presones y nel de A Veiga nun algamen los 4.000, la situación pon de manifiestu fasta que puntu depende la economía de Ribadeo del gastu asturianu. “Tola vida llevais viviendo de los asturianos… y por supuestu tolo que gastaba en comerciu por mi parte acabóse, espero que se den cuenta los demás qu’hai que curiar a quien nos curió y dexar los euros n’Asturies¡” insiste’l mesmu vecín. “N’Asturies a gastar el dinero” diz otra.

Otros comentarios lleven a conflictos anteriores pente gallegos y asturianos d’ambos llaos de la Ria. La pretensión de pone-y a la mesma el nome de “Ría de Ribadeo”, la negativa a pagar l’allumáu de la ponte, les estroces de la ría, siendo zona protexida, que dexaron ensin caláu al lláu asturianu… la falta de solidaridá de los gallegos demientres la cuarentena esconsoñó décades d’ofienses y lleva a los asturianos más ocidentales a garrar concencia de la emportancia de consumir nel propiu país.

Vitor Corte

This work is licensed under a Creative Commons Attribution 4.0 International License.