Hai 212 años Asturies declarábase soberana, reconociendo’l poder del pueblu perriba de toa inxerencia foriata. Andecha Astur cellebró esti sábadu un sentíu homenaxe al que foi el primer actu d’autodeterminación d’Asturies na dómina contemporania

“Esti fechu fálanos d’un pueblu, l’asturianu, qu’arguyosu de sí mesmu y naguando la llibertá escoyó’l camín de la soberanía y l’autoorganización”

El 9 de mayu de 1808 aportaron a Uviéu les órdenes pa sometese a la ocupación francesa y la noticia del fusilamientu de dellos asturianos nel 2 de mayu, lo que prevocó la indignación de los asturianos que presionaron a los diputaos de la Xunta Xeneral a rebelase frente al poder francés.

Ante les vacilaciones de los diputaos, el pueblu pasó a movilizase ya’l 25 de Mayu de 1808 campesinos ya estudiantes entraben armaos na capital, depués d’asaltar la fábrica d’Armes d’Uviéu, sofitando la declaración de la Xunta comu Soberana.

Esta Declaración tien llugar como consecuencia de la movilización y presión d’unes clases populares que tomen la pallabra como actores políticos n’arena pública, siendo asina demientres un periodu de cuasique un añu la istitución política dirixente del país, ensin  interferencia d’istituciones foriates. De magar el 25 de Mayu y fasta qu’esa soberanía-y fore arrincada pola fuercia les armes, Asturies foi una estatalidá dafechu soberana, articulando unes cadarmes polítiques y militares al marxe de cualesquier marcu español.

Andecha Astur cellebra tolos años alrodiu d’esta fecha’l so “Díi d’Andecha”, qu’esti añu cellebróse en circustancies mui especiales el sábado pasáu, con aforu llendau a 10 presones y respetando toles distancies y midies de seguridá. Llucía Fernández, vocera d’Andecha Astur, convidó a remembrar aquellos fechos pa “mirar al nuesu pasáu y remembrar quienes fuimos, camentar en quienes somos, y decidir quienes queremos ser. Qué futuru queremos pa la nuesa República Asturiana”. Nesi sen remitió a les pallabres prenunciaes nos xuramentos  n’autoproclamada Xunta Suprema Soberana, colos que roblaben los sos miembros un compromisu col qu’Asturies asumía tolos atributos d’un estáu soberanu; “El poder, tol poder, reside y procede del pueblu”.

Nel so discursu aludió tamién a la falta de competencia del gobiernu asturianu y comparó la situación actual d’Asturies cola que se taría viviendo casu de caltenese vixente la soberanía decidida polos asturianos va más de dos sieglos.

“Con soberanía, nun tariemos falando de pidir permisos o de rogar el pagu d’aides miserables; tariemos falando de comu xestionanos de manera que nadie nun quedare fuera, tariemos falando de soberanía alimentaria, d’encontos pa tolos seutores productivos, de comu entamar una educación igualitaria de calidá, on line si fae falta, pero igualitaria, de reforciar la sanidá pa que nun mos pille otra vegada desprevenios. Llonxe de servilismos, los asturianos decidiríemos lo que pasa n’Asturies”.

This work is licensed under a Creative Commons Attribution 4.0 International License.