El Ministerio d’Igualdá, con Irene Montero al frente, vien d’espublizar los requisitos pa la llicitación del serviciu d’atención telefónica 016 pa muyeres, ya que’l contratu actual fina en Xunu. Esti teléfono atiende a les víctimes de violencia por parte de la so pareya o expareya, pero cola anovación de términos atenderá tamién casos de violencia doméstica, sesual, mutilación xenital, matrimoniu forzosu, acosu llaboral y trata con fines d’esplotación sesual.

Nesos requisitos tiense’n cuenta la dificultá añadía que pue suponer pa una víctima tener qu’espresase nun idioma que nun ye’l de so metanes una situación tan difícil, polo que la empresa que quiera optar al contratu tien de garantizar l’atención en 53 idiomes.

Nos pliegos de contratación especifícase que l’atención nel 016 tará disponible n’español, catalán, gallego, euskera, valenciano, inglés, francés, alemán, portugués, chino mandarín, ruso, árabe, rumano, búlgaro, afgano, albanés, armenio, bereber, bosnio, brasileiro, cantonés, checo, coreano, danés, esloveno, eslovaco, farsi, turco, finés, georgiano, griego, hungaro, holandés, indi, italiano, japonés, lituano, noruego, persa, polaco, serbocroata, Sirio, Tailandés, Taiwanés, ucraniano, soninké, urdu,  bambara, mandinca, wolof, poulaar, mandinca y tamazigh. Dalgunes d’estes llingües fálense namás en tribus perllonxanes d’África o en rexones de la India, con escasamente un millón de falantes nel mundiu ya ensín presencia confirmada nel país, lo que dificulta desaxeradamente l’atopar trabayaores que puean facer esa llabor. 

Sicasí, les asturfalantes tornen a ser les grandes escaecies y tendrán qu’escoyer pente los 53 idiomes disponibles ún que nun seya’l de so. Nun hai costancia de denguna aición, reclamación o protesta d’Adrián Barbón al respeutu.

Llucía F. Marqués

.