Andecha Astur vien de presentar énte’l Centru de Padremuñu Mundial de la Unesco una denuncia na que solicita con calter urxente la incluxón na Llista del Padremuñu Mundial en Pelligru de los elementos del Prerrománicu asturianu que son Padremuñu Mundial y fueron inmatriculados pola ilesia católica

Seies de les costruciones pertenecientes al estilu arquiteutónicu conocíu comu Prerrománicu Asturianu son Padremuñu Mundial reconocíu pola UNESCO, polo que cunten col amparu internacional que representa la Convención sobro la proteición del padremuñu mundial, cultural y natural”, aprobada pola Conferencia Xeneral de la Organización de les Naciones Xuníes pa la Educación, la Ciencia y la Cultura (París, 1972), a la que s’acoyó l’Estáu español en 1982.

Reciéntemente vien de facese pública la información de la inmatriculación de la práutica totalidá de los monumentos prerrománicos asturianos por parte de la ilesia católica, incluyendo dellos de los reconocíos comu Padremuñu Mundial y poro, teóricamente protexios. Andecha Astur pescuda que la so privatización implica’l fin de los criterios reconocíos pola Alministración no que cinca a caltenimientu, rehabilitación, espardimientu y disposición pa les visites y l’estudiu artísticu, científicu y téunicu de dichos monumentos, desconociéndose fasta’l momentu los criterios que va aplicar nestos aspeutos el nuevu propietariu priváu, la Ilesia católica.

Poro, dende la organización nacionaliega soliciten al Centru de Padremuñu Mundial de la UNESCO “que’l Centru de Padremuñu Mundial alcuerde la urxente incluxón de tolos monumentos del Arte Asturianu reconocíos como Padremuñu Mundial na Llista del Padremuñu Mundial en Pelligru”, pa garantizar la so especial proteición nestos momentos de grave incertidume sobro’l so futuru y que s’abra darréu una investigación sobro la so situación rial.

Asina mesmo, señalen la responsabilidá del estáu español, por permitir el pasu de titularidá público a privao d’estos monumentos, incumpliendo l’artículu 5, lletra d, de la Convención sobro la proteición del padremuñu mundial, cultural y natural  y , comu cómpliz d’esti procesu d’inmatriculación, al gobiernu del “Principado”, pola so negativa a facilitar el llistáu ellaboráu de manera oficial pol Colexu de Rexistradores de la Propiedá d’Asturies, nel que se recueyen diches inmatriculaciones.

This work is licensed under a Creative Commons Attribution 4.0 International License.