Ayer entró’n vigor la resolución que los dexa ensin vacaciones, cola que’l “Principado” pretende conseguir la necesaria meyora de los cientros xeriátricos ensin aumentar les contrataciones y a costa de los trabayaores

L’avieyamientu la población asturiana xunto cola emigración de la mocedá, que dexa a los mayores ensin familiares cercanos que los curien, lleva décades faciendo xorrecer la demanda d’unos servicios públicos que -comu vien de demostrase- hai tiempu que precisen de refuercios, inversiones y contrataciones. L’andanciu punxo amás enriba la mesa la necesidá d’una mayor presencia de profesionales nos cientros.

La solución propuesta pol gobiernu, lloñe de consistir n’incrementar les plantiyes y meyorar la so situación llaboral -les condiciones son enforma inferiores a les de los trabayaores del SESPA- pasa por una serie de midies que carguen  tol pesu de la mayor presión asistencial al llombu d’unos profesionales ya afeutaos poles les dures condiciones qu’impuxo l’andanciu.

En total son cerca de 1.300 los emplegaos afeutaos pola resolución tomada pola xerencia d’Establecimientos Residenciales p’ancianos d’Asturies (ERA), qu’a partir de güei regulará les xornaes, vacaciones, permisos, llicencies y escedencies de plantiya de les residencies “en función de les necesidaes del serviciu pa garantizar la cobertura presencial demientres l’andanciu”.

Les nueves istruciónes van, sigún los sindicatos, en contra del conveniu coleutivu y la normativa vixente, polo que tan preparando midíes contundentes pa reclamar los sos drechos, dende la toma de midies llegales a una fuelga que pondría de manifiestu la importancia d’estos profesionales na xestión de l’actual cris sanitaria y nel curiáu de’un de los seutores más vulnerables de la población.

Llucía F. Marqués

This work is licensed under a Creative Commons Attribution 4.0 International License.