L’Asociación de Queseros Artesanos del Principáu d’Asturies declarare va pocu que los piqueños productores siéntense desdexaos por autoridaes nacionales, estatales  y comunitaries, “sintiendo que les polítiques agrícoles europees perxudíquenlos yá que tán principalmente empobinaes a aumentar la competitividá de grandes productores, siendo un seutor que va salir especialmente estropiáu de l’actual cris”.

Andecha Astur recueye esta reclamación y tresfórmala nuna riestra de posibles actuaciones que podríen tomase dende la Xunión Europea, presentando un documentu nel que s’entruga a la Comisión Europea por planes específicos p’ameyorar la situación d’estos piqueños productores; mencionen en concreto la revisión de les llinies d’actuación de la PAC pa esti grupu, la puesta en marcha llínies de financiamientu específiques de lliquidez pa les microindustries o l’espardimientu de campañes masives pa incentivar el consumu de productos llácteos de prosimidá y artesanales.

Pernando Barrena, eurodiputáu de la coallición Agora Repúbliques de la qu’Andecha Astur forma parte, foi l’encargáu de presentar esti documentu nel que tamién se recueye que la Política Agrícola Común (PAC) de la Comisión Europea diz tener ente los sos oxetivos “garantizar una renta xusta a llabraores, reequillibrar el poder na cadena alimentario, caltener paisaxes y biodiversidá, caltener fasteres rurales dinámiques, sofitar el relevu xeneracional…” pero que na práutica , la mayoría de les sos polítiques tán dirixíes a grandes empreses. “Escaécense y marxínense los piqueños productores, vitales pa consiguir la soberanía alimentario d’un territoriu, y qu’aíden  a caltener vives munches fasteres rurales fixando población, y aniciando un padremuñu natural y cultural de valor incalculable”.