L’incrementu de muertes demientres l’andanciu nel estáu duplica la cifra oficial de muertos pol Covid-19. Esti enfermeru danos una pista: la desatención mélica a otros enfermos demientres la cris sanitaria foi un factor lletal

Miguel Ánxelu Rodicio

Ta falándose agora muncho alrodiu les discrepancies pente los muertos por COVID que relata’l gobiernu (cifres oficiales sigún diagnósticu) y l’INE (Istitutu Nacional d’Estadística) que diz qu’hai sobro 47.000 muertos más de los qu’habría “normalmente”

Val. Dende la mio perspeutiva profesional comu enfermeru del HUCA teo que dicir que dambos, los dos datos son braeros.

Desplícome:
Los datos de muertos que da’l Ministeriu son los que-y apurren les CC.AA. de finaos por esa gafura que tan diagnosticaos de coronavirus. Pero claro, ye que finó y ta finando por otros motivos abonda xente que nun pudo ser tratada por nós nos hospitales al tar llendaos a l’atención d’esti andanciu.

Por poner un exemplu, fai poco ingresóme una muyer de más de 90 años que llevaba nel so llar QUINCE díes con un cadril frayáu y nun pudiera dir al hospital. Comu ella, foron munchos los pacientes d’estremaes dolencies que nun foron atendios, cola evidente consecuencia de muertes por desatención.
A esta situación llevómos la política de privatizaciones y retayos que lleven años aplicando na Sanidá Pública’l PP-PSOE, sobremanera’l PP.
Nun hai cames pa toos nin muncho menos ratios enfermera/paciente acordies al primer mundiu. Siempres vacilen de la pila mélicos que tien España.

Agora bien, un mélicu pue diagnosticate, pero si nun hai enfermeres pa tratate… de culu lo lleves.

This work is licensed under a Creative Commons Attribution 4.0 International License.