Dende Iniciativa pol Asturianu llamenten la probe presencia del asturianu na nueva web y considérenlo un pasu atrás na normalización nel conceyu
Pesi a que’n teoría nel conceyu ta trabayándose nun plan municipal de proteición y defensa l’asturianu, la nueva páxina web que vien de presentar el Conceyu Xixón presenta series deficiencies llingüístiques, siendo la presencia del asturianu cuasique nula. P’atopar la presencia del asturianu hai qu’investigar y tolos enllaces dan error. El dominiu“xixon.es”nin siquiera ta redirecionáu y tovía lleva a la web vieya.
“Esta páxina web había de dar exemplu nun afitamientu ‘mínimu’ de la presencia y usu del asturianu”
Iniciativa polAsturianu denuncia la probetaya presencia de la llingua asturiana na nueva páxina web municipal. El voceru Fonsu Martín aprofitó pa dicir que “ye un claru retrocesu nel avance de polítiques llingüístiques a sabiendes de qu’una páxina web municipal tien abonda visibilidá. Ye una ventana’l mundu na que puede tar presente l’asturianu”.
El vocal d’Iniciativa pol Asturianu comentó que “al traviés d’Internet podemos entrar a les páxines web municipales d’otres ciudaes como Santiago de Compostela, Vigo o La Coruña onde hai presencia digna del idioma propiu. ¿Por qué Xixón tien de ser menos nesi sen?”.
Fonsu Martín aprovecho pa manifestar que “dende Iniciativa pol Asturianu y dende otres entidaes como organizaciones polítiques, xuveniles, culturales y sindicales tuvimos trabayando durante meses nunnuevu Plan de Normalización. “Nun entendemos cómo ye posible que se presente una nueva páxina web que nun s’adapta a esifuturu plan que va a aprobase nun plenu”.
Redaición InfoAsturies
This work is licensed under a Creative Commons Attribution 4.0 International License.
