El Toma3 de Xixón acueye’l 28 de xunu la grabación d’esti ciclu de conciertos en formatu íntimu, grabaos y emitíos per Interné
En marzu del 2019 nacía Amosando, un ciclu de presentaciones de discos entamáu por musicasturiana.com, con un formatu ente conciertu acústicu con aforu reducíu, programa de televisión y alderique; too ello retresmitíu per Internet pa qu’aporte a persones de tol mundu. Tres la participación l’añu pasáu de L-R, Xaime Martínez, Ún de Grao, D’Urria, Anabel Santiago y Eva Tejedor & Les Pandereteres, esti 2020 yá hai confirmación de la primer edición; va ser el domingu 28 de xunu a les 17h en Toma3 de Xixón, onde van actuar Silvia Quesada y Cerezal.
Silvia Quesada -cantante de Tejedor y Los Gatos del Fornu- va presentar ‘Prefiero Ver Llover’, la so segunda referencia discográfica en solitario na que’l so soníu evoluciona hacia una propuesta pop mui cuidada y completa. Pela so parte, Cerezal van tocar los temes de ‘La Cereza’l Cielu’, un discu qu’entemez folk, pop, rock y incluso electrónica, llevando a la música de raíz tradicional a nueves sonoridaes. Los dos trabayos son una renovación dientro de la música fecha n’asturianu y tuvieron premiaos nos AMAS 2020.
La llibrería-café Toma3 de Xixón va acoyer esta grabación a les 17.00h del domingu 28 de xunu. La entrada ye de baldre pero’l so aforu ta llendáu a les persones que ganen una invitación participando nun sortéu al traviés de les redes sociales de la tienda online y distribuidora dixital musicasturiana.com, organizadora del eventu xunto col realizador audiovisual Javier Lueje y Goxe Producciones. Amosando tien el patrociniu de la estaya de Turismu del Ayuntamientu de Xixón y de la Fundación Caja Rural de Asturias.
Más de 100.000 reproducciones
Amosando ye una iniciativa pionera n’Asturies que bebe d’otres esperiencies asemeyaes exitoses notres partes del planeta y que nació col oxetivu de visibilizar a la música asturiana dientro y fuera de les nuestres fronteres, amás de ser una ferramienta promocional adaptada a les formas actuales de consumir música. El balance del 2019 ye mui positivu, con más de 100.000 reproducciones nos videos publicados en YouTube y Facebook.
Redaición InfoAsturies
This work is licensed under a Creative Commons Attribution 4.0 International License.
