Asturies algama un nuevu recor de pueblos abandonaos, sumando más de mil pente los vacios dafechu y los que tienen namás a una persona nellos; otros 3.000 un pasen de los 10 moraores

Asturies ye la nación del Estáu que más rápido pierde pueblos pol abandonu’l mundu rural, ensin qu’esista denguna política enfocada a frenar esta dinámica. Más entá, les aiciones del “Principado” abulten empobinaes nel sen contrariu, ello ye, a centralizar más entá tou na famosa “Ária Metropolitana”, condergando a l’Asturies más rural, aquella que más conserva les nueses señes identitaries, a la desapaición. La conceición de l’agricultura y la ganadería esclusivamente dende’l puntu de vista económicu, al marxe de la realidá socio-cultural del entornu rural caltién a la población rural nuna situación discriminatoria, pola ausencia d’ayudes y de servicios públicos, qu’aseguren unes mínimes condiciones de calidá de vida.

La falta de servicios y oportunidaes emburria a la mocedá fuera de los pueblos y la falta de mocedá nellos empeora les condiciones de vida de los que se queden. Los datos apurrios pol INE al respeutu son, añu tres añu, devastaores: 880 pueblos ermos, otros 321 a piques d’ello, 3.000 más nel esmucerín… unos datos tantu más llaceriosos cuantu nes ciodaes el problema de la vivienda lleva a alquileres descomanaos pal nivel de vida y a desfiucios diarios.

Llucía F. Marqués

This work is licensed under a Creative Commons Attribution 4.0 International License.