Lo ocurrío n’Asturies y nel mundiu demientres esti andanciu, con una proporción ablucante de muertos en residencies de presones mayores, evidencia la vulnerabilidá d’esti colleutivu y les deficiencies d’un sistema asistencial ineficiente
L’Asamblea Xeneral de les Naciones Xunies, na so resolución 66/127 , afita’l 15 de Xunu comu Díi Mundial pa la toma de concenxa del abusu y maltratu na vieyera. Nesa resolución afálase a los gobiernos a ensiertar polítiques que protexan a les persones de más edá comu población vulnerable y amuesase l’esmolecimientu pola situación a la que tan derivando los servicios d’ atención y curiaos, al mesmu tiempu que se reconoz la delda que tenemos con esa xeneración.
N’Asturies los mayores de 60 años tripliquen a los menores de 15 y la tendencia ye al avieyamientu progresivu, polo que garra especial importancia la necesidá d’una xestión afayaiza de los curiaos a los más vieyos. La concentración cellebrada ayeri en Sieru denunciaba “les febleces d’un sistema asistencial basáu na esternalización de servicios ya nun modelu de xestión privao que prioriza’l beneficiu económicu perriba l’atención ya’l curiau a les persones tienen comu consecuencies la precarización del serviciu asistencial, la falta recursos y de medios materiales y humanos coles qu’encariar tantu’l díe ente díe comu, especialmente, crisis sanitaries comu la que se vive anguañu”.
Na so intervención destacaron les deficiencies d’un sistema que trata a la vieyez ensin respetu, nel meyor de los casos más comu una enfermedá que comu una parte del ciclu vital, y que conderga a miles de persones d’avanzada edá a la precariedá económica, l’abandonu y la esclusión social. Estes deficiencies súmense a la falta de control y xixilancia del furrulamientu de les residencies xeriátriques por parte l’alministración y l’escaezu de les persones mayores que viven soles y s’enfrentaron soles a la situación xenerada pol andanciu, siendo munchos los que morrieron, ya non d’esta enfermedá, sinón de simple y cenciella desatención.
Por tou ello demanden de los poderes públicos “un nueu modelu asistencial centráu nes persones y nes sos necesidaes, un modelu basáu nel desendolcu de programes d’atención domiciliaria y d’aida na dependencia, que favoreza la inclusión y l’avieyamientu activu en casa o comu en casa. Reclamamos polítiques valientes qu’apuesten pola xestión pública na prestación de servicios asistenciales nes residencies y y que garanticen los curiaos afayaizos y les atenciones necesaries a les persones dependientes na tercera edá.
Nuria Prendes
This work is licensed under a Creative Commons Attribution 4.0 International License.
