“La perda del Horru de Vis ye un símbolu de cómu se maltrata y castiga la identidá y cultura asturiana. Dexaron morrer l’Horru de Vis y tantos otros bienes valiosos, pero sovencionen artificialmente les matances de toros o les Feries d’Abril n’Asturies. El so oxetivu ye minusvalorar la identidá y la cultura asturiana y sostituyila sele por un modelu cultural ayenu. Hai responsables políticos y tienen d’encariar les consecuencies”

Si los horros y paneres d’Asturies son parte fundamental del nuesu padremuñu, el d’El Pedrosu, asitiáu na parte alta de Vis, pueblu d’Amieva, yera una ayalga d’especial valir pola so antigüedá, calter artísticu ya emportancia hestórica. Perteneciente al escasu estilu decorativu de “La Francesá”, na so maera representábense escenes del llevantamientu n’armes d’Asturies contra les tropes d’ocupación franceses, al entamu’l sieglu XIX. D’ente los qu’amuesen estos debuxos, el de Vis, incluyíu nel Inventariu de Padremuñu Cultural d’Asturies (2008) y protexíu pola Llei del Padremuñu Cultural (2001) y pol so Reglamentu (2015), yera’l más valiosu pola bayura ya interés de los sos diseños. Los vecinos veníen denunciando dende hai años el so mal estáu y tantu les alministraciones comu los propietarios del mesmu foron avisaos del so deterioru, ensin que tuviere llugar la necesaria intervención de les autoridaes pa protexelu.