Dientro la campaña #ConsumiAsturiano #Futuru p’Asturies queremos presentavos a Judith Naves, que con 27 años -y dende los 21- ye una empresaria, ganaera y emprendeora con una visión mui clara del mercáu y de lo qu’Asturies pue ufiertar al mesmu y que va adautando’l so productu –la carne de races autóctones asturianes- a les necesidaes de cada momentu, siempres fiel a los sos principios: productos asturianos preparaos a la nuesa manera

• Prestaríame que nos presentares un pocu’l proyeutu ASTURSabor

Va mas de 5 años pusimos en marcha ASTURSabor, marca asturiana pionera na ellaboración de platos cocinaos de toles races autóctones qu’hai n’Asturies. Lo que facemos ye preparar el productu con materia prima de raza autóctona, de manera artesana, con recetes tradicionales y  siempre con productos asturianos. Por exemplu, el gochu asturcelta va guisáu con sidra, el Potru d’asturcón con vinu de la denominación d’orixen protexío de vino de Cangas.

Yo vengo de tradición familiar, de tercera xeneración, y lo que fice fue garrar les recetes que usaba mi güela nel restaurante y envásalo en conserva, ensin conservantes y natural, que cuando la xente lo consuma-y recuerde al platu tradicional de la so güela.

Tenemos tamién empresa de catering, na que utilizamos tamién materia prima de raza autóctona,  pa que la xente lo vaya conociendo. Además, col tema’l Covid sacamos el serviciu de llevalo a domicilio, ya no en conserva, sinon cocinao pal su consumo.

Finalmente, nosotros criamos los propios animales, tenemos ganadería propia de oveya xalda y de  vaca asturiana de la montaña, la vaca casina. Precisamente con ellos ellaboramos los productos en conserva y apurrimos la materia prima pal catering, ello ye, trabayamos tola llinía en completo, del campu a la mesa.

• ¿D’onde surde esta importancia que dais al usu de materiales asturianos?

En su die, cuando la crisis anterior, entamamos a criar oveya xalda, y había que da-y salida a toda esta materia prima. Entós entamamos a ver la necesidá nel mercáu de productos cocinaos,  vimos que la xente nun tenía tiempu a cocinar, que sobre too los xovenes nun se paraben dos hores a guisar… nesi momento pensemos, teníemos materia prima de raza autóctona, había una necesidá nel mercáu, ¿porqué nun entamar a facer platos cocinaos d’estes races autóctones? y entós lo que ficimos fue coyer el corderu xaldu, cocinalu y probar.

Entamamos col corderu y entós decidimos que si entamabemos, apostábemos por toles races asturianes. Pal resto les races autoctones lo que facemos collaborar con criadores que ten ascritos a la asociación, p’asegurar la trazabilidá y garantizar el producto, pero como nos cuesta tanto topar materia prima de vaca casina tuvimos que ponenos a críalo nosotros, así fue comu entamamos cola ganadería de vacuno.

• ¿Hai escasez de vaca casina?

Normalmente lo que mas se con

sume aquí ye la asturiana de los valles, pero hai ganaderos qu’apuesten pola vaca casina, aunque nun seya la mas rentable, ye carne de calidá excelente. Ya se-y catalogó comu meyor carne del Mundo, así que igual había que valorar lo nuestro, que nun sabemos, y ye un problema porque al final los xatos acaben saliendo fuera d’Asturies pa vendelos.

En xeneral la IGP Xata asturiana ta apostando muncho pola carne d’Asturies, y gracies a ello valórase muncho fuera lo que tenemos equí. faen mui buen trabayu.

Ye  muncho más conocía l’Asturiana de los valles, poniéndose en la piel del ganaeru, ye más rentable. La otra  tien menos carne pero la so calidá ye inigualable. Igual lo que hai que facer ye más publicidá, poca xente conoz les races autóctones d’Asturies, aunque cierto ye, que ca vegá siéntense más.

• La situación vivida estos meses fixo a muncha xente parase a pensar na soberanía alimentaria. ¿Supuso esta crisis dalgún cambiu na ganadería asturiana?

Nosotros tuvimos que adautanos, hubo picos de venta pero llueu estabilizose, puximos en marcha la venta on line, llevabemos los platos a domiciliu con toles midíes de seguridá, pasamos de vender cocinao a vendelo también en fresco, porque de repente la xente tenía tiempo a cocinar hubo que dar una vuelta de tuerca a todo…

Agora ye’l momento de valorar el campu en xeneral, del campu a la mesa.

• Yes muyer y ganaera. ¿Eso implica dalguna diferencia pa colos homes?

Agora hai muches muyeres ganaeres, aunque nun se escuche, namás hai que velo nes feries ganaeres o concursos. Yo toi nuna Asociación de ganaeres asturianes, tratamos de facer piña entre nosotres, cualquier duda, cualquier problema, siempre nos apoyamos les unes a les otres y eso ye lo que se debe facer. Antiguamente si yera un entornu mui masculinizao, pero cada vez va abriéndose más a la muyer, y agora mismo andará pol 50% pero agora trabaya igual la muyer que l’home.

La muyer nel campu ta visibilizándose muncho más. Pero hai que valorales mucho más, a les muyeres. Por todo, dende la ganadería, los guahes,… nun paramos. Pocu a pocu ta dándosenos la  visibilidá que merecemos, pero queda muncho por facer.

This work is licensed under a Creative Commons Attribution 4.0 International License.