Los establecimientos acomuñaos empresten un serviciu especial y ufren una riestra de ventaxes y comodidaes a los viaxeros que percuerren en moto la Ruta Vía de la Plata, qu’entama o termina en Xixón

La Rede de Cooperación de Ciudaes en Ruta Vía de la Plata vien d’anunciar la creación del Club de Productu Motorbike Friendly, que la so finalidá nun ye otra qu’ufiertar a los turistes que viaxen en moto esperiencies camentaes específicamente para ellos nel so viaxe al traviés d’esti itinerariu.

Amás de facilitar información sobro la Ruta Vía de la Plata, los establecimientos acomuñaos  (hoteles, restoranes y centros d’interés turísticu) ponen a dimposición de los viaxeros en moto tracks pal so usu en GPS y enllaces direutos pa navegación n’smartphones. Tamién-yos ufierten datos relativos a carreteres d’interés y rutes moteres, con indicación de gasolineres cercanes, tiendes especializaes, posibles visites empuestes ya información sobro los principales recursos turísticos de la zona.

Otramiente, los establecimientos que pertenecen al Club de Productu Motorbike Friendly van apurrir un espaciu onde poder guardar y protexer les motos mientres la nueche. Tamién ufren ervicios gratuitos estra, promociones y descuentos o detalles de cortesía a los motoristes que pernuechen y lleven consigo’l Pasaporte de la Ruta Vía de la Plata (esti pasaporte ye de baldre).

Los establecimientos del Club de Productu Motorbike Friendly van amosar xuna placa identificativa na so fachada. El viaxeru podrá atopalos nel llistáu permanentemente actualizáu na web de la Ruta  y cuando percuerra la Ruta Vía de la Plata.

Cola puesta en marcha d’esti Club de Productu sigue avanzándose na meyora de la competitividá de la Ruta Vía de la Plata. «Ye un pasu más -señala’l presidente de la Rede de Cooperación, Rafael Pacheco-, nel apueste por garantizar la Ruta Vía de la Plata como un destín calidable».

Redaición InfoAsturies

This work is licensed under a Creative Commons Attribution 4.0 International License.