La empresa, que se quexaba recientemente de los sos “malos resultaos na esplotación de l’autopista’l Güerna, incrementó’l so beneficiu brutu nun 25’1% l’añu pasáu, algamando los 676,7 millones € , de los que 39,5 salieron del peaxe asturianu. Reclamen qu’entá yos falten 437 millones más p’amortizar l’autopista y pretenden allargar  la so concesión, allegando que mos falta por pagar otros dos tercios.

Llevantar les barreres de los peaxes españoles ye de magar el 2018 una prioridá pal Ministeriu de Fomento, cola esceición del Güerna, camín d’algamar los 75 años, la concesión más llarga concedía nel estáu español, que decidió que los asturianos, y solo los asturianos, tenemos de pagar pa entrar y salir llibremente del país. Asina, gracies a los alcuerdos roblaos primero pol PSOE y llueu pol PP, Aucalsa tendrá drechu a xestionar les entraes y salies a Asturies dica’l 2050.

Les consecuencies económiques d’esti fechu tan nidies, encareciendo los tresportes y afalando a abondes empreses a desllocalizar pal otru lláu del Negrón, tratando d’esquivar esti coste añadíu, qu’Andecha Astur considera una esplotación económica discriminatoria  con saña contra’l pueblu asturianu.

Poro, reclamen la nacionalización del seutor y que s’entregue al Gobiernu d’Asturies la xestión de los tramos que percuerren el nuesu territoriu. Xusto anantes del andanciu Andecha entamara la campaña Peaxe non. ¡Ye un robu!” , espardiendo información in situ a los usuarios d’Aucalsa  y treslladando al Senáu el maltar de tolos asturianos, al travies del entós senaor Jon Iñarritu ( de la coalición Agora Repúbliques, a la que pertenez A.A)

Redaición InfoAsturies