La estela de corrución dexada tres de si  pol es-presidente del “Principado”, que pasará a la hestoria como ún de los mayores responsables del esfarrapamientu económicu, social, medio-ambiental y cultural d’Asturies, nun tuvo entá la necesaria consecuencia xurídica -seique fore a títulu póstumu- pola so implicación en casos comu’l d’El Musel, Riopedre o’l Casu Villa, al que se suma agora’l Niemeyer

L’esdireutor del Cientru Niemeyer, Natalio Grueso, vien de ser condergáu a ocho años de cárcele poles irregularidaes que se-y imputen na so etapa al frente’l mesmu, comu autor d’un delito continuáu de malversación de caudales públicos, en concursu con otru continuáu en falsedá en documentu mercantil. La Estaya Tercera de l’Audiencia Provincial, que xulgó el casu, atribui al entos secretariu de la Fundación Niemeyer, Jose Luis Rebollo, un delitu continuáu societariu, polo que lu conderga a dos años, entantu qu’impón una condena de 7 años y mediu al axente de viaxes José María Vigil por un delitu d’estafa en concursu con otru de falsedá documental mercantil.

Dexando a un llau lo ruino de les condergues, con tolos recursos per delantre, la sentencia dexa n’evidencia al fallecíu es-presidente del “Principado” Alvarez Areces, qu’ostenta entá la Medaya d’Asturies en categoría oru concedía pol «Principado» a títulu póstumu y la de fíu Predileutu concedía pol Ayuntamientu Xixón.

Yá nel 2014 Andecha Astur pidiere que se-y llevare a los tribunales comu responsable de la Fundación Niemeyer, quedando patente l’intentu de llibrase de la xusticia del es-presidente cola so ñegativa a declarar ente la comisión parllamentaria qu’investigaba la xestión del Niemeyer, cientru del que pretendía ser presidente vitaliciu.

Demientres l’actual xuiciu foron delles les voces qu’apuntaron direutamente a la participación d’Areces na trama de corrución de la Fundación, una estaya más de la descomanada mafia que’l PSOE entamó n’Asturies.

Asina, demientres el xuiciu Grueso reiteró en delles ocasiones que yera l’entos presidente Vicente Álvarez Areces el que daba les ordenes, apurriendo detalles de con quien despachaba, pa que y con que frecuencia. Jose Luis Rebollo apoya la so versión, afitando que’l patronatu de la Fundación Niemeyer taba controláu por «persones y cargos públicos toos ellos del PSOE y yera’l señor Areces el que yos daba les órdenes oportunes porque yera’l so xefe».

Rebollo implicó tamién a otros cargos políticos «Yo despachaba davezu col presidente del Principado, Vicente Álvarez Areces, y col so secretariu téunicu y viceconseyeru, Víctor Manuel Suárez. Por otru lláu, despachaba cola conseyera de Cultura y tamién lo facía continuamente cola alcaldesa d’Avilés».

Areces llevó a la so másima espresión la política del PSOE n’Asturies, redes clientelares,  financiación illegal y beneficios presonales a costa del Pueblu Asturianu. La ferrea proteición de la so figura  y la so impunidá na descomanada trama de corruciones nes que se vió implicáu demientres el so mandatu faen albidrar una continuidá pente les sos polítiques y les de los sos socesores al frente del PSOE y del “Principado”.

Nuria Prendes

This work is licensed under a Creative Commons Attribution 4.0 International License.