Un veceru entraba’n chigre con unos collacios cola sana intención d’almorzar tranquilamente. Tres de la barra aguardábenlu mazcaraos d’aspeutu inquietante, ocultos tres d’una bandera que, representa represión, facismu, la drecha más española y retrógrada. La reación ye la más sensata: colar del bar y dir a otru

Esa ye la cenciella hestoria, asocedía na Avda Galicia d’Uviéu y tuiteá el 6 de Xunetu pol so protagonista -que se presenta en redes comu Formícido- y que tien ya más de 700 retuits, 2’6 millones de “préstame” y centenares de comentarios.

El so tuit entama una reaición en cadena na que cientos de persones reconocen facer lo mesmo o se planteguen entamar a facelo, persones que saben que los símbolos tienen un significáu y que sí, importa, una bandera monárquica d’España en focicu nun ye un detalle aneudóticu nin un orniu, ye una declaración de principios ya intenciones que cualisquiera con un pocu de cultura puede lleer.

La importancia del fechu radica na toma de conciencia de que se pue facer daqué al respeutu, nun se tien porque aceutar comu “normal” o “inevitable”‘l convivir colos símbolos de los que son y fueron violentos represores de les llibertaes, acérrimos odiaores de tolo asturiano, xabaces defensores de les desigualdaes.

Cómo señala un de los munchos tuits que retruquen a Formícido, naide tien porque tener nel so establecimientu símbolos que defendan el racismu, la xenofobia, el machismu, el clasismu… y si los tien, lo mínimo que podemos facer ye nun entrar, nun consumir y amosar publicamente la nuesa disconformidá cola esibición pública d’estos.

Poro, yo declarome publicamente comu una de les persones que refuguen el contautu colos portaores d’estanquera y xuno la mio voz a la de tolos que proclamen #conbanderadespañanon.

Llucía F. Marqués

This work is licensed under a Creative Commons Attribution 4.0 International License.