Les peculiares circustancies d’esta cuarentaytresava edición del Festival de la Sidre de Nava nun torgó que los espertos s’aconceyaren pa decidir cuales son esti añu les Meyores Sidres y Derivaos de la Mazana
Ayeri, 8 de Xunetu, aconceyaba en Nava el xuráu del Concursu a les meyores Sidres y Derivaos de la Mazana del XLIII Edición del Festival de la Sidre de Nava: Miguel Ángel Fernández, Pablo Fernández Escayu, Jesús González Ponte, José María Fernández Cao, conCeferino Cimadevilla comu presidente del comité.
Seique entá nun se conocen los resultaos pa la meyor sidre natural d’Asturies, que ye la categoría que más interés xenera y que se dará a conocer nos prósimos díes dientro les activiadaes pal festival, la superioridá de los productos maliayos quedó patente nos premios otorgaos, ocho en total, de los que seyes foron a parar a Villaviciosa.
La Meyor sidre de nueva espresión foi la de Martínez Sopeña Hermanos, Españar, el mesmu llagar que recibió una distinción pol Meyor vinagre, con Oles; El premiu a la Meyor sidre esplumoso endóxena foi pa Valle, Ballina y Fernández, llagar que tamién llevó el premiu a Meyor sidre de formatu 1/3 col so botellín d’El Gaiteru, entantu que’l de Meyor sidre esplumoso esóxena foi a parar Mayador; Roxmut, de Castañón, foi escoyía el Meyor aperitivu.
Ya saliendo de Villaviciosa, pero quedando cerquina, la Meyor sidre de xelu declaróse la de Valverán 20 mazanes, de Bodegues Masaveu, en Sariegu y la Meyor sidre rosao: Angelón Rosée, de Vilba de Angelón, de Nava.
Esti añu echaránse en falta la folixa sidrera na cai, pero los actos continuarán a puerte presllada, incluyendo’l Campionatu Nacional d’Echaores de Sidre, qu’esti añu sedrá retrasmitíu por interné.
Vitor Corte
This work is licensed under a Creative Commons Attribution 4.0 International License.
