La denuncia interpuesta por Andecha Astur ente la Oficina Europea contra’l Fraude (OLAF) foi almitía a trámite a finales del mes pasáu, pero les nueves informaciones sobre’l tema faen necesario ampliar la información en poder d’esti organismu
Na denuncia orixinal informábase a la OLAF de la necesidá d’investigar l’usu que la UXT n’Asturies ficiere de los fondos europeos de formación pal emplegu, fondos colos que -presuntamente- se cometiern dellos delitos de fraude de sovenciones sumando un valor estimáu de cerca un millón y mediu d’euros pente’l 2010 ya’l 2014.
Los fechos más recientes venceyaos al casu, comu l’apaición de nueos ñicios, el rechazu n’Audiencia de los recursos que presentaron los acusaos o’l señalamientu del sindicatu comu responsable subsidiariu, fizo necesario apurrir al organismu européu toa esta información pa que puedan continuar col procesu coles mayores garanties y con tolos datos al so algame.
La Fiscalía pidi más de 40 años de cárcele por una riestra d’actuaciones fraudulentes desendolcaes de manera “concertao y sistemático” y les prebes señalen a una implicación direuta del sindicatu nestes aiciones; la rempuesta del actual secretariu xeneral de la UXT n’Asturies, Javier Fernández Lanero, xustifícándolos comu un “problema alministrativu” nun fae sinon recalcar la necesidá d’investigar y castigar esti fraude.
La denuncia énte la OLAF señala comu presuntos culpables d’estos delitos a los seyes dirixentes de la UXT que van ser sometíos a xuiciu oral por talu fraude: Justo Rodríguez Braga (es-Secretariu Xeneral), Mónica Menéndez (es-Secretaria d’Alministración), Manuel Díez Cancio (es-Secretariu Formación), María Jesús Ocaña (alministraora de les sociedaes Localmur y Formación 2020), Alberto González Castaño y Silvia Sariego, ensin que se descarte que a lo llargo del procesu puea ampliase’l númberu d’implicaos.
Andecha Astur tornó pidir nesta ampliación de la denuncia que, comu midía cautelar, queden en suspensu toles sovenciones que puea tener en trámite’l sindicatu UGT.
Redaición InfoAsturies
This work is licensed under a Creative Commons Attribution 4.0 International License.
