Darréu entama una campaña de denuncia de la situación llaboral de la mocedá asturiana tres de l’andanciu, resaltando que, de fechu, la xuventú d’Asturies lleva décades careciendo una crisis permanente que-y dexa comu única alternativa la emigración
Les consecuencies del andanciu Covid-19 sobrepasen per muncho les sanitaries y l’escenariu que dexa tres de si el parón ye llaceriosu. Hai indicadores oxetivos qu’asina lo amuesen, comu’l el mayor indiz de población en probitú o riesgu d’ella o’l númberu de persones que se ven forciaos a acudir a los estremaos bancos d’alimentos esistentes pa susistir, siendo la mocedá ún de les estayes de la población más perxudicaos pola situación.
Dende la Organización de Mocedá d’Izquierda Soberanista Darréu denuncien que la cris del Covid golpea con especial fuercia a la mocedá asturiana, por que cae enriba d’una Asturies somorguiada nuna crisis de décades “yá tábemos en crisis, una crisis permanente que la xuventú carez dende va décades nesti país. Una situación de paru, precariedá, falta d’accesu a vivienda digno… y como única alternativa, la emigración”.
Nesi sen va empobinada la so nuea campaña, qu’espeya esta situación col llema “La normalidá nueva, la precariedá de siempres”, denunciando les causes y culpables, pa lo que señala específicamente la inoperancia les istituciones asturianes ya un sistema capitalista “que nun fae más qu’afondar añu a añu nun empioramientu de les condiciones llaborales, na precariedá y temporalidá de seutores como’l turismu y otros d’esa cacarexada “nueva economía”, como’l casu de los riders, mentantu afonda al mesmu tiempu nel desmantelamientu industrial y d’otros seutores productivos. En definitiva un panorama de progresiva perda de drechos acompañada tamién pola perda de llibertaes con llexislación como la Llei Mordaza”.
Comu soluciones a esto apunten a un necesariu cambéu radical nel funcionamientu del nuesu país a tolos niveles, qu’incluya pente los sos preseos la soberanía y la superación del capitalismu.
A lo llargo del branu estremaes aiciones treslladarán estes denuncies a la sociedá del país, entamando por una tirada de pegadielles col mencionáu llema col que presenten la so campaña.
Redaición InfoAsturies
This work is licensed under a Creative Commons Attribution 4.0 International License.
